《魚缸博客》旅遊平台攜程（０９９６１）公布咗第一季業績，期內歸屬股東淨利潤約
３３﹒７５億人仔，每股盈利５﹒１８人仔。舊年同期歸屬股東淨虧損約９﹒８９億人仔，每股
虧損１﹒５２人仔。換言之，公司今年第一季扭虧為盈。期內收入約９２﹒１１億人仔，升
１﹒２４倍，超過２０１９年疫情前同期水平。
攜程指，第一季度國內外業務繼續呈現強勁復甦態勢，國內酒店預訂量按年增長超過１倍，
本地遊酒店預訂量較２０１９年疫情前按年增長１﹒５倍。公司又指，出境酒店同機票預訂量恢
復到２０１９年疫情前同期水平嘅４０％以上，國際ＯＴＡ平台機票預訂量按年增長超過２倍，
較２０１９年疫情前按年增長超過１倍。
睇埋嚟緊內地端午節假期嘅機票預訂情況，直至６月６日，端午假期嘅國內機票預訂量超過
１４０萬，比一星期前增長近５７％。旅遊出行愈嚟愈活躍，都會有利攜程嘅營收狀況。另外，
攜程早前宣布斥資過千萬人仔，首創「旅行足跡」系統，希望可以改善導遊嘅服務質素，相信想
吸引多啲人用公司嘅平台，目的都係向好嘅。
攜程今年年初到４月都處於橫行格局，５月開始反覆回軟，但跌到２５０天線附近見到支持
。股價６月２日上升６﹒２９％，之後一日裂口上升，升勢仲ｋｅｅｐ得住。暫時股價升破埋
５０天線，短線估計好大機會突破到２５０天線，並且可以挑戰３００銀水平。有貨嘅話繼續揸
住先，升到上３００銀左右就食胡，守唔住２４０銀先離場喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
