RSS訂閱 踏入今個星期最後一個交易日，相信缸友又再開始驚下星期一魚缸個走勢，因為自從每個星期六、日都有示威遊行之後，魚缸往往會跣低，重點係每次情況都比上一次嚴重。嚟緊星期六日（１０日至１１日）已經有巴打叫大家去機場「接機」㗎啦，香江第一鐵鳥屐飛（００２９３）龍頭一定受影響，博客覺得等埋下星期初段，就可以吼低掃貨。
其實，屐飛可以逆轉到燃油對沖蝕錢已經令「孖屐」驚喜，今年第一季發盈喜時已令缸友開始心動，不過前日（７日）屐飛份中期成績真係缸友又驚又喜，一方面虧轉盈賺１３﹒４７億銀，仲派中期息０﹒１８銀，管理層仲話預計下半年有更好表現，但另一方面又話香江嘅示威活動對未來幾個月預訂人數按年跣低咗雙位數，嚇到缸友都唔知掃唔掃貨好。
不過，睇返啲評級佬嘅評價，富瑞就覺得屐飛成本減低，抵銷咗乘客同貨運收益縮水嘅影響，同埋派０﹒１８銀都符合派息比率５３巴仙，所以繼續「他屐」１６銀同「掃貨」評級。
大和就再正面啲，覺得屐飛份成績表已經好過預期，雖然收入少過預測，不過勝在轉虧為盈，加上屐飛提升緊營運效率，對未來好樂觀，所以都繼續畀「掃貨」評級。
博客覺得近期嘅政治因素唔多唔少都會影響到魚缸㗎啦，屐飛再叻都好難逆市踢高高，所以博客認為短炒屐飛其實係唔錯嘅選擇。
喺技術走勢嚟講，屐飛目前向緊下，用保歷加通道睇，底線依然仲向緊下，反映屐飛可能仲有更大嘅縮水空間，不過，如果睇ＭＡＣＤ嘅ＤＩＦ已經縮水緊，意味屐飛可能已經撻到接近見底，仲差唔多蜈蚣彈添。同樣睇快步ＳＴＣ，屐飛已經喺超賣區接近半個月，所以其實已經預備已經儲氣拗腰。
至於部署方面，博客建議等埋下星期一、二（１２日至１３日）個魚缸走勢先，如果勢色唔對就忍一忍手，再等下時機。相反如果「孖屐」已經接受咗每個星期六、日都示威遊行帶嚟嘅影響，可以近１０銀水平掃貨，上望至少１１銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
