RSS訂閱 博客依然最鍾意炒Ｄ高增長同有業務前景嘅魚毛，阿里健康（００２４１）就最符合博客心水啦！
首先阿里健康截至２０２０年３月３１日止全年年業績好過預期，佢總收入９５﹒９７億銀人仔增長８８﹒３巴仙；毛利２２﹒３１億銀人仔上升６７﹒６巴仙，股東應佔虧損６５８﹒６萬銀人仔同比收窄近９２巴仙；經調整後利潤淨額２﹒６１億銀人仔增長１１４﹒８巴仙。
另外，佢目前依然維持高增長，四年之間收入年複合增長達１７２巴仙，期內股東應佔虧損見迅速收窄，分別為蝕２﹒０８億、蝕１﹒０７億、蝕８１９５萬和蝕６５９萬人仔，虧幅迅速縮窄，２０２０財年虧損縮窄幅度達到９２巴仙，若撇去股權激勵等因素，係２０１８年就已經扭虧為盈！
再看看Ｄ關鍵數據，由於佢阿媽係神州最大型電商阿里巴巴（０９９８８），醫藥銷售自然係佢頭號業務，年度醫藥電商平台收入１１﹒７億人仔，同比增長６９﹒６巴仙，營收佔比１２﹒２巴仙；自營業務收入８１﹒３億銀人仔，按年增長９２﹒４巴仙，營收佔比８４﹒８巴仙。增長表現其實相當唔錯！
另一方面，阿里健康基本已經打通患者、醫院和醫保之間嘅通道，互聯網醫療體系開始步入成熟期。截至今年財年，阿里健康互聯網醫療平台簽約執業醫師、執業藥師同營養師等達到４﹒２萬人，簽約醫療機構超過１﹒５萬家，二級和三級醫院數量超過３９００家，仲係全國１７省，近４００家三級醫院接通醫保支付。
花旗亦都看好佢，話佢將成為線上處方藥銷售開放政策的主要受益者，加上來自阿里巴巴提供嘅協同支援帶來優勢，故將目標價從２０銀上調至３０銀。報告預料，神州線上醫療和健保品零售市場的成交總量可在２０２９年達到１﹒２５６萬億銀人仔，阿里健康作為行業龍頭，或可佔有６５巴仙的市佔率。
股價走勢方面，筆者認為佢雖然前景亮麗，目前有少少「炒過龍」，但係佢近期回調都企穩１８銀呢個短期支持位，若缸友喜歡「短炒」，建議現價可買少少博上返２０銀！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》講述被情緒困擾真實個案，情緒病最終如何走出低谷？► 即睇
