即將迎來五中全會,孖屐對於十四五規劃嘅憧憬日漸起哄!睇到部分之前炒起咗嘅內需佬今日似乎回一回,博客就覺得哩個係一個落場低吸短炒嘅機會。而博客就覺得可以留意吓今朝跌痛嘅維達國際(03331)啦!
可能大家會覺得好奇怪!點解博客會推隻今日急跌嘅內需佬,不如我哋就先睇睇業績數據再講!維達今日就公布咗截至今年9月30日止三個月嘅業績,期內經營溢利按年增長超過成四成八到5﹒45億銀;經營溢利率擴大4﹒6個百分點至14﹒2巴仙;毛利都增加到17﹒6巴仙至14﹒14億銀。睇業績表現其實都幾樂觀,最重要嘅係公司毛利率可以擴闊5﹒6個百分點至36﹒9巴仙,可以話表現叻醒!咁到底大跌係咩原因?博客就覺得係因為單計第三季收益嘅業績下跌咗減少0﹒2巴仙至38﹒30億銀,同時公司喺首三季期內收益仍然要減少2﹒3巴仙至114﹒64億銀,先令到孖屐驚青走佬。
而睇公仔圖維達之前因為板塊炒高而走上,更去到頂位32﹒09銀,相信都係因為炒風先上到哩個價。所以一出少少利淡消息,啲炒友都散得好快,令到股價跌得急咗。不過!睇返維達首三季業績表現都穩定且理想,經營溢利大增逾八成到18﹒02億元;而經營溢利率提升7﹒2個百分點至15﹒7巴仙;毛利上升27﹒3巴仙至43﹒54億元,而毛利率都擴大8﹒8個百分點至38巴仙,表現相對穩定,雖然公司業績係因為疫情帶動利好,但係疫情嘅不穩定性同埋嚟緊五中全會再推動內需嘅氣氛,相信維達股價會有所反彈!
睇返公仔圖,今日嘅驚青情緒令到股價回落返到六月頭約23銀水平,博客就覺得喺內循環帶動下,行業將會要次回彈,而維達現時入手嘅值博率相對較高。而今日睇到佢跌到22﹒4銀時有支持一路慢慢走上,或者就係一個信號提醒大家留意佢!博客就建議可以現價入博反彈。第一目標價睇圓底支持位約26銀水平,如果到時板塊利好,有望可以睇圓底開始位置約30銀水平。
《編者按》本欄搜羅即市傳聞,惟消息未經證實,《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情