魚缸噚日抖一抖之後,今日結果都係頂唔順,又再裂口低開。風雨飄搖之下博客就同大家睇吓賭股。
無錯,就係賭股!雖然一向賭股畀人個感覺都係較為弱勢,但以兩隻藍籌賭股為例,由九月馬交政府公布修改賭牌條例,嚇跌全線賭股之後,呢兩個月以嚟,金沙(01928)已經由低位反彈超過三成,所以其實一路都有資金慢慢撐起個價位。
呢個慢慢湧上嚟嘅升浪,當然都有大行留意到,高盛早排就出研究報告唱好賭股,提到馬交特首賀一誠曾經話博彩牌照問題時間緊迫,唔排除會喺有需要時侯延長特許期。高盛講起,當年頒布《博彩法》之後都用咗六、七個月先批到三個賭牌,所以時間緊迫下係好有可能會好似特首話齋會延長特許期。
高盛估計,現有賭牌到期之後,完全禁止搞賭嘅可能性好低,所以就繼續建議應該要趁低撈賭股,包括澳博(00880)、銀娛(00027)、金沙等。
博客就建議大家揀番藍籌嘅金沙或者銀娛,不過上面都講到金沙已經升咗三成有多,但係銀娛同一時間都係升咗兩成,所以銀娛有望追番落後,再升多少少。十天線45.67銀以上可以吼入,目標先睇番9月高位54.65銀,但係收穿廿天線43.96銀就要走先!
《編者按》本欄搜羅即市傳聞,惟消息未經證實,《經濟通》亦不保證內容之準確性。
【與拍賣官看藝術】常玉作品屢創天價,背後其實藏著跌宕起伏的人生► 即睇