RSS訂閱 國際能源署（ＩＥＡ）最新嘅報告指出，關注到近期能源價格升得好快，又認為「貴能源時代」已經重新來臨，甚至有可能危害到經濟增長添。再加上中東地緣政治問題擾攘多時，令「孖屐」開始擔心原油供應會受干擾，從而影響油價走勢。三桶油入面，中海油（００８８３）上游資產佔比相對高，對油價波動應該喺最敏感，最受惠油價走高嘅消息。
近期，石油、天然氣以及煤碳嘅價格開始起勢走高，油價今年累計錄得２５巴仙升幅，有市場人士仲估計年底之前或會回歸「３位數」。花旗國同沙特嘅關係又因早前記者失蹤事件變得惡化，而花旗國對入伊朗嘅制裁又即將開始，缸友們都心慌慌啊！
匯證報告指出，季節性需求強勁，加上伊朗出口錄得進一步下滑，令第四季全球原油庫存大幅減少。所有佢就上調咗今年布蘭特原油價格嘅預測，由每桶７３美金至７５﹒８美金，將中海油「他屐」由１７﹒３９銀升至１９﹒７６銀，評級為「買貨」。
睇返個公仔圖，其實股價已經處於超買區，缸友可以等到股價回落至１４銀左右吸納，不過如果跌過１３﹒３銀，就應該同佢一刀兩斷，分手ｓａｙ ｇｏｏｄｂｙｅ啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
