經營番茄醬、芝士、同各式調味品嘅全球第五大食品製造商卡夫亨氏(Kraft Heinz),相信大家好幫襯過,公司最近公布2018年嘅全年業績,結果令人大跌眼鏡,最傷心嘅莫過於「股神」巴菲特,事關佢旗下巴郡公司係卡夫亨氏最大嘅股東,持股近三成。業績公布後,隻股盤後急瀉兩成,令「股神」持股蒸發超過30億美金,折合240億港紙有多,呢次真係老貓燒鬚。
卡夫亨氏喺星期四盤後公布2018年全年業績,第四季嘅收入為68﹒9億美金,每股盈利只有84美仙,兩者都低過市場預期。業績唔好,主要原因係公司披露舊年有成154億美金嘅商譽減值。咁都不特止,卡夫亨氏仲透露,舊年10月曾收到花旗國證交會嘅傳票,要求針對公司嘅會計政策,以及採購相關嘅內部控制流程進行調查;結果顯示,間公司第四季嘅產品銷售成本增加咗成2500萬美金。
股民聽完份業績報告,嚇到心驚驚,齊齊沽貨,搞到當日隻股係花旗國盤後交易暴跌咗兩成,創2015年來新低。
咁大隻股突然咁跌法,都真係殺過「股神」一個措手不及,嚟緊嘅星期六(23日)就係佢每年向股東發表公開信嘅重大日子,唔知會唔會補上卡夫亨氏投資教訓呢一筆呢?
查實「股神」年度投資者公開信,可以話係投資界一大盛事。盈盈都好期待「股神」2019年嘅發展大計,因為近年巴郡持有嘅現金不斷累積,自2016年都唔見有咩「大刁」,舊年佢仲呻好難搵到吸引嘅投資項目;再加上佢今年都快將88歲,拍擋芒格更加已經95歲,令人關注邊個係「股神」嘅接班人。《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】美眾院通過法案,香港駐美經貿辦恐遭關閉,你是否支持中方對此作出強烈反制?► 立即投票