RSS訂閱 盈盈幾鐘意睇軍事演習，因為個Ｄ士兵哥哥個個都甘有型有款，睇吓人都精神Ｄ呀。不過，遲Ｄ可能就無得睇啦。盈盈最近留意到花旗國陸軍喺賓夕法尼亞州舉行咗一場別開新面嘅軍事演習，參與演習嘅並唔係高大有型嘅士兵哥哥，而係一隻隻機械人！
參與軍事演習嘅機械人叫「ＲｏＭａｎ」（Ｒｏｂｏｔｉｃ Ｍａｎｉｐｕｌａｔｏｒ），係一種履帶式機器人，主要幫軍車手鏟走路上嘅障礙物，透過程式語言應對唔同嘅複雜環境。呢個計畫原來係實驗地面機械人嘅自主性，比佢地支援自動駕駛團隊，之後支援未來作戰嘅地面車輛。
雖然花旗國陸軍就懶神秘咁冇透露呢啲軍事機械人嘅技術原理同互動方式，但作戰能力發展司令部（ＣＣＤＣ）同陸軍研究實驗室（ＡＲＬ）嘅研究員Ｃｈａｄ Ｋｅｓｓｅｎｓ就解下畫，話要完成清除路障嘅任務，機械人個腦要轉下彎，需要辨識到障礙物，去決定用邊種互動模式（推、拉、抬等）完成任務。最近ＲｏＭａｎ越嚟越醒目，已經識清走多種物品嘅碎片同埋拖動樹枝等物品。唔睇唔知，原來佢仲識打開容器拎走入面嘅嘢，花旗國大兵仲可以用語音發指令比機械人，搞到盈盈我都想試下玩！
其實，要突破敵方陣地都真係幾危險吓，事關呢Ｄ障礙有唔少都係炸彈，加上每年都有唔少花旗國大兵因為喺阿富汗進行軍事行動時受唔少炸彈襲擊，有咗機械人去幫手清除障礙，咁就可以避免不必要嘅傷亡啦。
事實上，呢項咁架勢嘅軍事演習係陸軍研究實驗室為期１０年嘅研究專案，除咗軍方組織外，成個卡士都相當勁揪，參與方仲包括華盛頓大學、賓夕凡尼亞大學、ＮＡＳＡ噴氣推進實驗室、卡內基美隆大學同通用動力公司！
雖然盈盈好想世界和平其他國家唔再會打仗，如果真係迫不得已要打，未來或都會係一場機械人大戰，而主宰成場戰爭嘅，就係一個國家嘅軍事科技程度去到邊，但最起碼都唔駛搞到血流成河，未來打仗都唔駛犧牲咁多士兵哥哥，當然最好就唔好打仗啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
