RSS訂閱 「兩會」啱啱閉幕，總理李克強份工作報告講到明要做好「六穩」（就業、金融、外貿、外資、投資、預期）同「六保」（居民就業、基本民生、市場主體、糧食能源安全、產業鏈供應鏈穩定、基層運轉），經濟有阿爺大大力十卜，實有運行啦！點知吉利（００１７５）突然折讓近８％配股，淨籌６４﹒５億，講到明係為嚟緊嘅不確定性做好準備，搞到個價一一下跌穿１０﹒８銀配股價，孖屐反應都幾激烈下。
博客唔知吉利呢個決定係幾時做，但其實都幾令人不解，事關神州乘聯會噚日先講，國內乘用車市場零售按月明顯回暖，今個月前三個星期主力廠家零售量總體日均３﹒７萬台，按月零售量總體增長６巴仙，增速按年都只係跌咗５％，喺呢個大環境下，表現已經算好好。
如果吉利堂堂大車廠，面對行業整體增速跌咗少少，就即刻話要配股，未免細膽咗少少。況且睇返集團披露嘅四月銷量數據，賣咗超過１０﹒５萬部，按年增長２巴仙，按月更多成４４巴仙。而今年頭四個月總銷量有３１﹒１５萬部，係全年銷量目標嘅２２巴仙。老老逗逗，公司銷售按月明顯有增長，國策扶持下又唔會衰得去邊，８個月之內追埋果７８巴仙真係未必太難喎。
大行都有反應呀，中金話，公司現金充足，今次配股相信係為咗幫母公司減輕財務壓力吉利，可能會稀釋每股純利６巴仙，但中長期嚟睇，吉利同富豪汽車擬合併之後會發揮較強協同效應，公司銷量、營收同淨利潤規模都會大幅提高，合併之後亦計劃喺多地上市，會有助股價上升，所以就維持佢目標價１３﹒７銀。
睇返公仔圖，參考舊年同今年幾個低位，就算係疫情最嚴重嘅第一季，股價穿咗１０銀之後就會反彈，今次個價相信會乘機調整，缸友不妨１０蚊樓下入一轉。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
