之前香江就有位善長人翁經宣明會助養咗兒童十幾年後,先發現咁多年來畀嘅錢都唔係直接落到受助人個袋,仲要個所謂受助人睇落仲好景過自己,呢吓先崩潰!為咗睇實千里之外嘅行動係按照善長人翁嘅劇本進行,有平台就用區塊鏈科技幫手監測住種樹project嘅每一棵樹,睇實棵樹嘅生長狀況,唔知宣明會有無意思要參考吓呢?
區塊鏈平台Veritree係個用區塊鏈技術監察實行還地於林嘅組織,會同好多大企業合作搞ESG Project,最近就同韓國「三叔」搞咗次喺馬達加斯加紅樹林種200萬棵樹。可能好多人連馬達加斯加喺邊都未知,不過Veritree就可以幫投資者監察住個種樹計劃,甚至每一棵樹。
經過區塊鏈平台,每一棵樹都會獲發唯一名牌,當地負責種植的人員會提交種植狀況嘅即時數據,數據會記錄喺區塊鏈入面,因為每棵樹都有自己個code,所以可以確保樹木唔會重複計算。之後善長人翁就可以經個App睇實每棵樹嘅生長進度、唔同樹之間生長有無唔同、吸咗幾多碳等,因為係上咗區塊鏈,亦都可以確保唔會有人偷偷哋改咗佢。
所以區塊鏈除咗用喺大家熱炒嘅Crypto之上,基於「不可篡改」同「獨一無二」嘅性質,區塊鏈仲有好多唔同嘅作為。盈盈就覺得呢個方式非常值得宣明會借鑒,畢竟我哋真金白銀,都係想幫到真係有需要嘅人,但係山高皇帝遠,你話點都得啦。以為有名有姓就有保證,點知乜都係假,有區塊鏈幫手增加透明度就真實得多啦!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
【與拍賣官看藝術】常玉作品屢創天價,背後其實藏著跌宕起伏的人生► 即睇