RSS訂閱 蔚來(09866)公布完新車款SUV ES7一個禮拜左右，就發生咗件不幸事故！一架蔚來測試車噚晚喺上海創新港停車樓三層墜落，兩名數字座位測試人員傷重不治。其中一名遇難者係蔚來員工，另一名係合作夥伴員工。
蔚來官方聲明指，事故發生後，公司第一時間協同公安部門啟動事故原因調查分析程序。根據對現場情況分析，可以初步確認今次係一單意外事故，強調同架車本身無關係。蔚來又指，對今次意外非常痛心，對罹難同事同合作夥伴員工表示深切哀悼，並且已成立專門小組，幫助家屬處理善後事宜。
今次意外似乎對蔚來股價影響唔大，今日低開2.28%報180銀，但好快就重拾升勢，早段曾經反彈超過2%。當然，蔚來講到明呢單純屬意外，同車輛安全、性能等方面無關，相信今次只係單一事件，唔會嚴重打擊公司銷售。博客又覺得，依家「孖屐」焦點放番對新車續航力同其他性能嘅憧憬，以及近排對汽車業嘅利好政策，所以蔚來今日低開完無耐就升番。
不過，博客睇蔚來1分鐘圖，190銀遇到阻力，11點半之前keep住喺186到188.7銀上落。睇埋日線圖，股價暫時仲貼住保力加通道頂部，但9RSI升到76，接近嚴重超買區，目前亦同上市高位196銀差約8銀，博客覺得現價再追值博率唔高，建議大家等股價落番160銀左右先吸納，有貨嘅朋友係時候食胡先喇。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
