RSS訂閱 自從美國公布10月份通脹率急降至7.7%之後，港股就開始升，當然，兩者冇直接關係，但其後先推出16條房地產救市措施，再推20條防疫優化，繼而又因為疫情封控政策過緊而令內地多處民眾不滿，國務院聯防機制上月底舉行新聞發布會，指出封控管理應該「快封快解、應解盡解」。
對於股民嚟講當然係搵錢至上啦，市場觸覺敏銳嘅將上述行動同官方言論，理解為即將放寬防疫限制，再者，有北京大學本月初聯名呼籲當局應該將開放經濟活動放喺首位，統一全國防疫標準，向各界傳遞將發展作為首要任務嘅明確訊號，令社會經濟生活回歸正軌。內需同消費股自然率先受惠。
過去5個交易日，零售業累積升幅達8.17%，係表現最好行業，以過去一個月計表現最好就係地產業，累積升幅達22.8%。投資者可以喺零售同地產業揾好股。零售業入面喺過去5個交易日、一個月、三個月、半年同一年計都升嘅只有三隻股票，分別係中國中免(01880)、中國順客隆(00974)同利福國際(01212)，唔使問梗係揀中免啦，首先係佢上市只有大約三個半月，其次集團係全球最大旅遊零售運營商，佔全球旅遊零售行業市場份額24.6%，而擁有全國最多免稅店。
內地經濟必然將會復常，對零售業有利。集團截至今年第三季經營收入達到393.6億人仔，雖然唔及去年同期嘅495億人仔，但按季升超過42%，淨利潤46.28億人仔，按季增加16.5%。中免股價喺11月30號升穿195銀收市後，至今5個交易日都守住喺195銀以上整固，似係要突破10月份上市高位218銀，以11月1號調整低位144.7銀計，有超過70銀上升空間，即係股價可見280銀以上，超短線止蝕可以訂喺194銀。
地產股方面，碧桂園(02007)因為配股關係，今日又包尾，但呢隻股經常唔係排頭就包尾，今早跌超過10%，可以現價小注博入，目標望住3銀先，可訂2.75止蝕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
