《笑傲缸湖》盈盈時常覺得特斯拉(Tesla)D車嘅款式,充滿時代感得來又有型,難
怪積累咗一班粉絲,而花旗國嗰邊特斯拉股價今個月亦升咗大約一成!而特斯拉除咗電動車之外
,仲研發無人駕駛。電動車特斯拉就耍家啦,唔知無人駕駛方面,佢喺行內又係咪權威呢?
探子回報,近日有間諮詢公司Navigant,出咗一份19間無人駕駛汽車企業嘅排名
,個排名係以戰略同執行度,整體公司嘅市場化策略、技術、市場份額各方面去為呢D企業評分
。而令人覺得出奇嘅係,綜合排名當中排首位嘅係通用汽車(GM),而特斯拉竟然榜上無名!
雖然特斯拉嘅老細「鋼鐵人」馬斯克(Elon Musk)好出名,但公司發展無人駕駛
車路途上都遇到好多波折。早前嘅安全事故,更加大大拖累咗特斯拉發展嘅進程。相反,通用汽
車就收購咗一間無人駕駛汽車Cruise,呢間公司輕鬆獲得通用嘅汽車設計同底層架構,兩
間公司工程師一直緊密合作,而上星期通用已經向政府申請出年生產自動駕駛車,進展比特斯拉
順利得多。
其他公司方面亦都密密練兵,就連福特、寶馬、福士都加入戰團,之前豐田都話要同
PizzaHut合作推出自動車送外賣計劃,而特斯拉未來究竟會點樣突出重圍呢?真係好考
「鋼鐵人」嘅能力啦! 《任盈盈》
----------------------------------
Navigant自動駕駛汽車公司綜合排名榜
----------------------------------
排名 公司
----------------------------------
1 通用汽車(GM)
2 Waymo
3 戴姆勒-博世(Daimler-Bosch)
4 福特(Ford)
5 福士(Volkswagen)
6 寶馬-英特爾-飛雅特克萊斯勒(BMW-Intel-FCA)
7 安波福(Aptiv)
8 雷諾日產聯盟(Renault-Nissan Alliance)
9 富豪-美安-愛立信-Zenuity
(Volvo-Autoliv-Ericsson-Zenuity)
10 標緻雪鐵龍(PSA)
-----------------------------------
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】的士記分制將於周末生效,你認為該制度可否幫助的士提升服務質素?► 立即投票