RSS訂閱 《笑傲缸湖》上個月喺花旗國發生咗件令當地小朋友十分傷感嘅事，之咪就係玩具反斗城
（Ｔｏｙｓ Ｒ Ｕｓ）全線執笠囉，唔少網民嘅留言都係清一色負面感覺，除咗哀傷就只有不
捨。而最落寞嘅唔單止係花旗國嘅街坊，仲有３萬幾名打工仔女飯碗不保，就連一蚊遣散費都冇
收到，真係「有汗出，冇糧出」，慘。
由於要執笠清盤，玩具反斗城入面嘅所有資產都要變賣，位於公司總部嘅吉祥物「長頸鹿傑
弗里」（Ｇｅｏｆｆｒｅｙ ｔｈｅ Ｇｉｒａｆｆｅ）嘅雕像，因為太大份同運送成本太昂貴
，冇乜人肯出價買走佢，於是一班前員工就悉心準備一副棺材，即興搞咗一場「喪禮」，仲有埋
張「車頭相」，真係隔咗個「芒」，盈盈都可以感受到嗰種傷感氛圍。
唔知係唔係呢種傷感氣氛感染咗其他人，玩具反斗城清盤人大義澟然拎咗一萬蚊美金出嚟買
走佢，仲運送到距離總部約５０里外嘅一間兒童醫院。之後一間醫療服務公司嘅董事會成員知道
有呢項義舉後，亦都決定出資六千蚊美金，為「長頸鹿傑弗里」安置新居，將佢放喺嗰間兒童醫
院嘅大堂入面，去陪伴住一班病咗嘅小朋友，希望佢可以繼續為小朋友帶嚟歡樂，而「長頸鹿傑
弗里」又同時可以唔駛做「量地官」，免受「失業之苦」。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
