RSS訂閱 《笑傲缸湖》一個星期之前花旗國克萊門森大學嘅美式足球隊（老虎隊），嬴咗花旗國全國
美式足球冠軍，所以侵侵（特朗普）打算請佢哋去白宮玩一日，一般白宮嘅大廚會喺掛住林肯幅
畫嘅國宴廳煮餐勁嘅，但因為政府停擺緊，白宮嘅廚師都停薪放假了∼喺老虎隊抵達之前，侵侵
就同一眾記者講，打算請佢哋食麥記、Ｂｕｒｇｅｒ Ｋｉｎｇｓ同Ｗｅｎｄｙ’ｓ（都曾經喺
香江風光過㗎），仲要加啲ｐｉｚｚａ添。最後仲要加多句，「我係認真㗎，呢啲係佢哋最鍾意
食嘅嘢。」盈盈一聽就知有弦外之音啦∼
據侵侵點名做假新聞嘅ＣＮＮ話，侵侵喺白宮同老虎隊講，「啲漢堡包、ｐｉｚｚａ、薯條
係花旗國製㗎，都係花旗國人最鍾意食嘅嘢。」當然仲要補多槍「因為政府停擺，所以我哋先要
訂快餐，係我（侵侵）畀錢嘅。」侵侵又解釋，唔想將今次嘅招待活動推遲到政府停擺結束之後
，唔肯通過撥款興建圍牆嘅民主黨今次真係「躺著也中槍」。
白宮發言人亦都發聲明話，侵侵希望舉辦一場慶祝老虎隊攞到全國冠軍嘅活動，唔想同民主
黨喺邊境安全問題再進行談判，白宮大部分「打工仔」都暫時放假，所以侵侵自己畀咗今次活動
嘅使費，買咗佢聲稱所有人都最鍾意嘅快餐。
唔知侵侵係有心定無意，但一眾網民都話侵侵「涼薄」同「姑寒」，喺佢主場
Ｔｗｉｔｔｅｒ（推特）大鬧：「食一塊煎到黑晒起焦嘅牛扒配茄汁都好過食麥記。」亦有網民
話「佢根本就離晒地，邊有人會叫運動員食垃圾食物㗎﹗」
有人歡喜有人愁，同一時間亦都有球隊嘅粉絲哭笑不得，事關佢係打政府工嘅，因為政府停
擺令佢無得出糧，「雖然見到球隊贏到總冠軍好開心，但見到停擺嘅問題被放埋一邊，好令人沮
喪。」《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
