《笑傲缸湖》比特幣嘅出現原本就係想擺脫政府管理,減少央行對貨幣嘅操控,但目前仍然
處於商品交易階段,未能直接用作日常支付,不過,原來係美洲小國嘅漁村,已經開始應用比特
幣作日常支付,邊個國家咁架勢堂?
講緊嘅係中美洲國家薩爾瓦多嘅其中一個小漁村!呢個地方名為「埃爾松特」,由於薩爾瓦
多喺今年6月初已經將比特幣定為法定貨幣,所以全球人類都定焦係呢個小漁村,如果佢成功就
代表比特幣可以應用於日常啦!
作為全球第一個將比特幣列為法定貨幣嘅國家,梗係要整返個配套方便大家交易啦!當地比
特幣交易APP名為「Bitcoin Beach」,其實就同我地日常用嘅「轉數快」咁方
便,市民可以揀用呢個APP或者現金進行支付,目前呢個地方有500個人用比特幣嚟購買日
常雜貨或者交水電費。
由於呢個國家有70%人口都無銀行帳戶,所以比特幣係呢個國家發揮好大作用,該國總統
認為比特幣可以幫到一啲開唔到銀行戶口嘅人,又或者可以吸引外國投資;不過商家佬就比較高
風險啦,早一期比特幣升到6萬美金,又跌到落3萬頭,有雜貨舖因為比特幣爆升而換個新雪櫃
,但而家身家又大縮水。
至於遊客到呢個小漁村又點算好呢?唔使擔心,當地提供找換機,只要你入美金落去,再開
通埋個APP,就可以直接兌換,不過兌換就會收返3蚊美金手續費,如果有興趣想體驗下比特
幣交易樂趣就記住留意啦!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
【與拍賣官看藝術】常玉作品屢創天價,背後其實藏著跌宕起伏的人生► 即睇