RSS訂閱 《笑傲缸湖》每屆奧運，喺熱情如火嘅夏天舉行，選手村入面，最熱門嘅唔係可以半夜醫肚
偷食嘅消夜，係ｃｏｎｄｏｍ呀！運動員精力旺盛，朝早搏命比賽爭金牌，夜晚都要有其他運動
宣洩體力，所以上屆里約奧運就派咗破紀錄４５萬個安全套！不過今屆因為疫情，主辦方東京唔
想選手之間有太多接觸，就決定剩係派１６萬個左右，夠唔夠用呀？
為咗減少運動員喺夜晚進行其他「友誼賽」，東京奧運籌委會除咗派少啲安全套，仲特登將
所有床都變曬做高磅數紙板床。話就話高磅數，但係就承受唔到兩個人同時喺一張床到運動，好
陰濕呀！
東奧籌委會仲話，選手村房間係希望畀選手好好休息，所以疫情下每間房都嚴禁性行為！就
算派安全套，都希望選手可以當紀念品拎返屋企先用喎。
盈盈就覺得，要發生嘅始終會發生，緊火起上嚟，少咗安全套同紙板床又算得係啲咩，但就
算係表達咗主辦方唔想疲情加重嘅願望囉，唯有期望選手會乖乖哋忍一忍啦。
不過盈盈都覺得有啲嘥咗，畢竟日本作為避孕套工業大國，聽講唔少日本避孕套公司，原本
都希望喺奧運展現「０﹒０１ｍｍ」超薄安全套嘅技術實力，而家就無呢支歌唱喇。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
