【金融海嘯十年】3個前iBanker的故事

 

雷曼少年 奇幻之旅

　

　

Plato Wai

學歷：

　　•美國卡尼基美隆大學（Carnegie Mellon University）資訊系統學士及資訊管理碩士

 

工作經驗：

　　•2004-2008 －雷曼兄弟控股公司股票衍生產品銷售部分析員

　　•現為網店平台公司Shopline業務發展經理

　

　　「上兩個月睇黃子華，最後佢以『幻海奇情』形容自己廿幾年的棟篤笑生涯。最近我成日都諗起自己由10年前加入Lehman（雷曼）到現在，成個歷程都好奇幻，好多唔知點解會發生的事、因緣際會，所以無雷曼，我應該就唔係今日嘅我。」雷曼兄弟前員工韋百濤（Plato）如是說。

　

　　10年前的今日，Plato正正就在雷曼位於IFC的辦公室內執包袱，見證爆煲「被抄家」的一刻，後來又親歷公司輾轉落入日資機構野村證券手上。當時他以第一身寫下網文《抄雷曼的家》，在山雨欲來的日子裏贏過不少金融人的共鳴。最近他翻看舊作，那種奇幻感覺依舊揮之不去，仿是冥冥中有主宰，正如訪問中他說得最多的：「如果當年無……就唔會……」。

　

離開雷曼十年，Plato仍留著當年的紀念品及文件。

　

　　奇幻旅程的起點，由他如何入行說起。14年前剛大學畢業，因實習時前輩一句戲言「試下Cold call iBank可能有人請」，他遂致電到投行自薦，其中一間便是雷曼。

　

　　「都係膽粗粗試下，點知打去真係有人聽喎，佢又真係駁我去HR喎。我份應徵信仲要寫錯咗個公司名，但佢哋最後都係請咗我。」糊里糊塗成了雷曼一員。「入咗去先知，原來呢行根本唔興Cold Call，至少我做咁多年都無見過。你好難解釋點解投行會請個無經驗無Background仲要Cold Call的人？」

　

旺市入投行 一朝夢痛醒

　

　　那年頭，大學生無論唸哪科目標都是入投行，Plato覺得能攀過這門檻總算不賴，所以即使被編入一個僅得4人的小部門，從「打雜」做起也沒相干，一切慢慢來。誰知一踏進金融界，便迎來回歸後最旺的市況。「2006年、2007年最瘋狂的日子，日日幾千萬成億咁做，一開市就無離開過個位；耳仔無離開過個聽筒，生意是湧埋嚟的。明明係Sell嘢比人但就串到同客講︰『唔得閒呀，你等得就等啦』……」

　

　　小小部門愈做愈大，才不過兩三年的事，這四人小隊去到爆煲前已擴充成擁有50名員工的部門。「發展完全係意想不到，諗返起當日睇住同事逐個逐個入嚟，啲枱櫈一行變兩行；兩行變四行……係最初十幾倍。諗到呢度又覺得這經歷好神奇。」

　

　　當然在局外人眼中，整件事最奇情的，是明明一間百年企業；一個火紅的股市，還有小伙子如日方中的事業，竟可在一夜間蒸發得無影無蹤。雖然Plato最終順利過渡到野村時代，但坦言事件對他的信念造成很大衝擊，也直接影響他的未來。

 　

　　他認為，80年代香港孩子普遍的路，就是懂性後入學，然後不斷努力追求一間好的小學、中學、大學，然後出到社會找份好工作，「起碼我條路係咁行。」幸運地躋身投行，賺到錢、有成功感又有社會名望，某程度上引證了一分耕耘一分收穫。「但去到嗰個位，成件事突然Collapse咗，新公司甚至整個市場唔同晒，而你就由天之驕子被說成騙子、始作俑者，仲有人兜口兜面向你示威，突然間覺得好迷失，更加唔知日後條路點行。」

　

雷曼爆煲後數年，中環處處可見雷曼苦主示威，Plato指每次看見都不是味兒。

　

跳出金融界 創業屢敗陣  

　

　　在新公司頹了近兩年，終於待不下去。他苦笑謂那時其實「窮得只剩下錢」，在有限的選擇下就此踏上了創業之途。「當時同朋友搞咗個網上補習平台，自信這是天下無敵，一定掂的，但最終年半就玩完。依家睇返，個網其實係一Pat屎，當時嗰種叫自負唔係自信。但話分兩頭，如果當年無入雷曼做iBanker，相信亦唔會有資金同那種自負去創業。」

　

兜轉多年，Plato發現自己最愛是Start-up，坦言現時在Shopline工作得非常開心，「唔似以前咁日日瞓醒都唔想返工。」

　

　　創業初嘗失敗，Plato終於醒了，驚覺以前就算在金融行內怎樣呼風喚雨，外面世界仍很大，離開那行自己其實甚麼也不懂，人生還有很多事要學。唯一得著，就是發現了自己對創業的興趣。及後兩三年，他不斷學習兼「實習」，曾拍伙朋友開設過公享工作間，又設計過旅遊美食分享App等，可惜每次都是「交學費」，但幸慶每次都Fail Better。

　　

　　在Start-up界輾轉回來，總算賺到點知識經驗，但始終每盤生意都像欠缺點甚麼似的，無一能持續。2014年婚後不久，有感年紀不輕而責任愈來愈大，總不能無限量投注在這場創業遊戲，於是他在Facebook寫了一篇感性文，藉此惜別創業夢。「正當我躊躇緊iBanker經驗幫唔到我搵工；創業經驗人哋又唔當一回事，我係咪要考個牌去做保險？幻海奇情Part 2就出現嘞！」

　

　　當時，文章被一位舊相識看見。話說當年營運共享工作間，經常要籌辦不同的活動，而這人正是當時創業交流活動的參加者。「當年我搞Co-working Space；她就創辦了協助中小企開設網店的平台Shopline。看到文章後她主動聯絡我，問我有無興趣去佢公司做Business Development……又係嗰句啦，如果當年無搞呢門生意，就唔會識到現在的老闆。」

　

助他人創業 延昔日夢想

　

　　現時，Plato每天都會接觸很多不同類型的工作，由銷售、擴充周邊業務至尋找合作夥伴也是一腳踢，近來還從幕後走到幕前，不斷代表公司四出參與有關網上營銷的活動，但他笑言自己忙得非常開心。「好開心可以繼續做有關Start-up的工作，呢度真係好多嘢學，有時幫人開網店而且有好成績，自己都好有滿足感。以前未發完的創業夢，由其他人延續都唔錯吖！」

　

應不同公司邀請參加網上營銷有關的活動，是Plato現時在新公司的主要工作。

　

　　工作以外，幻海奇情還有「同場加映」。Plato曾以「作文幾乎肥佬但又好鍾意揸住枝筆發牢騷」來形容自己，話說10年前開Blog寫下了《抄雷曼的家》系列網文，及後又在網誌內指點股市、記載創業經歷。誰知過了這麼久，近年他發現原來自己一直有支持者，去年還分別獲邀在立場新聞及信報的Startupbeat寫專欄。今年書展，他更以這些年的創業經歷為題，出版了首本著作《柏拉圖自殺式創業》。「這些一切，都是緣自雷曼。」

　　

　　總結這10年，雷曼確曾害Plato慘到一個地步，但卻又讓他經歷了一段奇幻旅程。「我真心覺得，如果當日公司無爆煲，今日應該仲留喺呢行。做到好悶好厭，但供緊層樓仲養緊兩條化骨龍，慣咗搵10萬使9萬。你叫我轉工？出面任何一份工人工都即時減一半，根本接受唔到，於是就繼續Loop，Loop埋下半世。」因此，他對於當日雷曼不經意地燃燒了自己，照亮了他的下半生，仍然心存感激。

　

爆煲當日的報紙，Plato一份不漏地儲了10年。

　

雷曼「兄弟」年年聚 難忘被「抄家」一幕  

　

　　每年9月，一班前雷曼員工都會聚舊。今夕10年，大伙兒選到灣仔吃和牛海鮮火鍋，彷彿要吃得好好，才不枉大家曾經出生入死。或者相聚的更深層意義，在於經歷一場人生無幾可的戰役後，看到當年戰友們都安然無恙，這對彼此來說有種特別意義。

　

　

　　幾乎每年都會當聚會搞手的Plato說，以前同組40、50個同事，現時超過一半人仍在金融界打滾，但留在投行的少，反而大部分人轉了去商業銀行和零售銀行，中資尤甚，這或多或少反映出過去10年香港金融業界的變化。其餘一半人，有的去了創業；有的轉了行做律師辦社企，有的回去繼承家族生意。

　

　　「離開Lehman後，大家都各有各忙，轉工、轉公司、組織家庭生BB，已經唔可以好似以前咁成日Hang out，但可能因為一齊經歷過一件好重要的事，感覺大家唔只係普通舊同事咁簡單，所以即使平時有幾忙，到咗呢個日子大家都會好重視，點都抽空出來一聚。」

　

　　說來沉重，但其實聚會氣氛非常愉快，吃吃喝喝，談近況談人生也談金融行頭的八卦，然而講得最多的始終是「舊史」，而舊事當中又以公司被抄家的一幕最深刻。

　

學會及時行樂 珍惜緣份

　

　　Plato憶述爆煲前一晚，還開開心心出席友人的婚禮，誰知不過12小時，翌日便接到公司破產的消息。「記得第日是中秋假期，瞓到9點幾接到同事電話，話睇到Bloomberg報道公司當晚就會宣布破產，所以大家都返緊公司執包袱，否則到時真係落閘放狗就咩都攞唔返。我都急急腳返去，見到班同事拖喼紙皮箱大袋細袋乜都齊，平日好有衝勁的地方，突然間變得好悲涼……」

　

　　那個晚上，雷曼終沒被查封，全體同事翌日還需準時上班。Plato笑說，前一天沒回工作執拾細軟的同事最慘，捧著紙箱一落樓就被記者追足九條街，他則兩手揈揈跟在後面「食花生」。 

　

　　往後一個月，公司運作幾乎完全停頓，員工也被迫變得游手好閒。「大家朝早回去打個卡，就落街食個3粒鐘嘅Brunch，有人去行街睇戲，留在公司的就事無忌憚打機、搵工。」直到月底， 野村證券宣布收購雷曼包括香港在內的部分業務，這段「偽退休」生涯才得完結。

　

　　事隔10年，Plato憶述當年公司被「抄家」的情境，對照其文章，還原度幾乎是100%。他坦言，當日的滿目瘡痍仍在眼，不過經此一劫後，相信無論是他還是昔日的「雷曼兄弟」，大家都學會了及時行樂，而且彼此更懂得惜緣惜份。

 

全新節目《說說心理話》青少年不可以戀愛！？真實個案講述驚心動魄經歷► 即睇