《小傳日記》魚缸整固無乜力，輝山蒸發三百億！

　　侵侵上任後第一個考驗出現！皆因花旗眾議院決定延遲對新醫保議案嘅投票。如果最終都通過唔到，咁樣侵侵其他嘅減稅建議等關鍵政策，都幾難獲得通過喇。前景咁唔清晰
，道指噚晚繼續不變應萬變，再次象徵式收跌４點報２０６５６點。
　　香江魚缸就照舊睇成績表做人，暫時班魚毛表現都係好壞參半，無特別重大利好消息。恒指高開６８點就窄幅上落，最多只係跌６４點後又上返去，埋單都成功倒升３０點收２４３５８；國指就微跌９點報１０４７７。全日魚缸成交８３４億銀。
　　缸外世界就緊張到不得了，影響香江未來五年命運嘅特首投票日將會喺星期日（２６日），朝早９點正式開始！《經濟通》嘅特首選戰專頁ｈｔｔｐ：／／ｗｗｗ﹒ｅｔｎｅｔ﹒ｃｏｍ﹒ｈｋ／ｗｗｗ／ｔｃ／ｎｅｗｓ／ｓｕｐｐｌｅｍｅｎｔ＿ｃｅ＿２０１７﹒ｐｈｐ，將會為大家報道第一手消息，記得睇實喇！
　
＊特首跑馬仔周日昅到實，美醫保再拖道指有所失＊
　
　　睇返缸內消息，今日最激嘅非輝山（０６８６３）莫屬。隻股早市尾段突然被洗倉，急瀉
８５巴仙之後午市停賽，收報０﹒４２銀，曾經低見０﹒２５銀創新低。摷番紀錄，主席兼大股東楊凱喺２０１５年質押公司逾２５巴仙股份去借２４億，去年底再向平保（０２３１８）旗下平安銀行延長部分貸款一年。今朝短短半粒鐘，輝山市值由３７７億暴跌到得番５７億。楊凱就話挪用資金指控不實，仲話對於股價急瀉，自己一Ｄ準備都無。輝山真係要快Ｄ交代清楚喇！
　　同係乳業股嘅中國聖牧（０１４３２）收跌３％；現代牧業（０１１１７）最多跌３％，收盤無起跌；而蒙牛（０２３１９）都嚇一嚇試過跪低近２巴仙，之後跌幅慢慢收窄，最後收升１格，報１５﹒２６銀。
　　砵砵車長汽（０２３３３）日內將會放榜，派成績表前率先飆前近４巴仙，報９﹒１銀，係最叻國貨佬；吉利（００１７５）都唔執輸，向前衝近４巴仙，報１２﹒２８銀。上年多賺９２巴仙嘅北汽（０１９５８）獲大摩唱好，跳起１巴仙，報８﹒５８銀。
　
＊長汽業績前粉絲兜番轉，中移與壽仔績後腳軟軟＊
　
　　中移（００９４１）特息落空，噚日被狠狠質低，今日繼續喺低位浮沉，埋單再唔見近１％
。
　　壽仔（０２６２８）上年賺少咗４５巴仙去到１９１億人仔，野村話新業務價值增長５６巴仙至４９３億人仔好過預期，而嚟緊呢年增長會緩和，維持「買貨」評級同埋目標價２９﹒３７銀。結果今日腳軟１巴仙，報２４銀。
　　中海油（００８８３）就威得多啦！本來全城都估佢舊年會「見紅」，點知好叻叻，唔使蝕，全年賺逾６億人仔跌９７巴仙，好多間大行即轉口唱好，全日跑前近４巴仙，報９﹒２４銀，係最勁藍戰士。
　　埃芝芝（００７９９）之前張成績表夠曬勁，全年多賺七成半，今日繼續落鑊，炒起近１３巴仙，報１０﹒０８銀。美圖（０１３５７）今日放榜，亦彈起超過３巴仙，報１５﹒５銀。
　
＊ＩＧＧ績靚炒高來慶祝，銀聯又落閘地主縮一縮＊
　
　　銀聯又落閘，今次係唔畀內地客碌銀聯卡買港樓，以控制走資。上年內地客佔新盤交投近
１４巴仙，唔多唔少會影響到香江樓市，新地（０００１６）腳軟半個巴仙，報１１４﹒３銀；新世界（０００１７）亦跣低近２巴仙，報９﹒７７銀；噚日拎超過３億銀回購嘅長實
（０１１１３）就企穩住腳，微升唔夠半個巴仙，收報５４﹒２銀。
　　安徽海螺（００９１４）上年多賺１４巴仙去到８６億，但缸友似乎唔多滿意，富瑞亦嫌佢第四季毛利率低過預期，最終趴低２巴仙，報２７﹒７銀。
　
＊中興與瑞聲你追我又趕，醫藥食補藥缸邊齊領放＊
　
　　手機佬高偉電子（０１４１５）上年少賺５３巴仙去到２８５０萬美金左右，派７﹒９７７港仙，雖然獲大摩重申「入貨」評級，但今日都係要跪低半成，報２﹒４９銀。上年盈轉虧近
２４億人仔嘅中興通訊（００７６３），獲富瑞指營運業務毛利率高過預期，重申「入貨」評級
，跳高２巴仙，報１５﹒２銀。瑞聲科技（０２０１８）績後繼續強勢，再飛起近３巴仙，報
９８銀，試過高見９８﹒１５銀破頂。
　　個別醫藥股幾生猛，威高（０１０６６）績後獲德銀同高盛升目標價，彈起８巴仙，報
５﹒３７銀。國藥（０１０９９）今日將會派成績表，阿仔國藥股份（滬：６００５１１）率先公布上年賺多咗近７巴仙去到５﹒５億人仔，阿媽就有近３巴仙進帳，埋單３７﹒５５銀。假期愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。