習大大來了！Ｊｅｎｎｙ同一眾行家都收到風，偉大的國家主席習近平會喺６月２９日至７月１日嚟香港，而期間警方保安更加列為最高級嘅「國家領導人及反恐級別」。雖說行程要保密，但Ｊｅｎｎｙ聽不同政商界朋友講，已收到出席各大活動嘅邀請
，足本行程早在商界流傳。之但係，非ＶＩＰ想見習大大？相信要響核心外圍，再外圍嘅外圍碰碰運氣喇，祝大家好運。
＊警方緊張大師上身，習大大訪港「一國兩制」＊
習大大下星期四起訪港三日，香港警方完全緊張大師上身，全體警務人員由今個月２８日起至下月２日起要取消休假，並且每日返１２粒鐘。Ｊｅｎｎｙ齋聽都覺得辛苦呀！不過原來早喺五年前，習大大喺內地出行係「堅持有利於聯繫群眾的原則，減少交通管制，一般情況下不得封路、不清場閉館」等大家可以近距離一睹佢風釆。
可惜，今次習大大訪港，警方已預告大規模封路，而且一定會封得多過上年中共中央港澳工作協調小組組長張德江訪港嗰時。只好嘆句：喺內地嘅習Ｆａｎｓ真係有福！
＊想見習一面？早起畫紅妝！＊
習大大難得訪港，坊間梗有數不盡的活動爭住邀請佢，Ｊｅｎｎｙ聽政商界朋友講已收到邀請出席不同活動。２９號一落機，習大大會先到灣仔君悅酒店坐坐先，之後就出席特首梁振英為佢而設嘅宴會。
第二日就會去石崗軍營閱兵儀式，同埋灣仔會展官方文藝晚會。嗱！有幸獲邀嘅嘉賓都唔容易做㗎！首先，朝早嘅閱兵安排更加係要清晨６點半前去到昂船洲軍營安檢，再上官方小巴前往目的地，即係天未光就要起身準備出門。去到晚會，就需預早差唔多５小時到場，因為又有安檢
，仲要排隊輪候進場。Ｊｅｎｎｙ奉勸各位出席嘅女士，唔好打扮得太花巧喇，好似第一夫人彭麗媛咁，簡單大方就夠，如果唔係排隊排到晚會完咗都未見到習大大一面，咁幾唔抵呀！
＊彭麗媛將探訪老人中心＊
喺習大大閱兵嘅同時，身為中國潮流指標嘅彭麗媛就會去老人中心探訪，夜晚先再Ｊｏｉｎ返老公去晚會。Ｊｅｎｎｙ好期待見到彭麗媛的一身打扮，皆因凡佢加持過的品牌都會大紅！
《Ｊｅｎｎｙ Ｙｉｎ》
《經濟通通訊社２３日專訊》
etnet榮獲HKEX Awards 2023 「最佳表現證券數據供應商」大獎► 了解詳情
