《炒股戰記－富仔》阿爺監管似放鬆，美團中海外係時候買啦！

　　在下富仔，係一位敢試敢闖、視炒股為樂嘅90後。富仔嘅字典從無放棄，只有堅持！因為我相信喺茫茫股海中，只要搵啱方法，保持信念，身心都可以致富！富仔嚟緊嘅炒股戰記，會同大家講講我個模擬倉，要睇實邊隻股票板塊、幾時入手幾場走人，每兩星期同大家update一次，從中搵出致富策略！
　　魚缸近排好番少少，尋日(20日)恒指更加升超過800點，上番去24900點樓上，富仔心情大靚呀！尋日升得咁急，今日嘔番少少出嚟都好正常嘅，亦似乎等緊聯儲局議息結果。睇埋公仔圖，上星期三(12號)裂口高開低收，出咗個吊頸，都知唔係好嘢，結果之後幾日都係陰跌。去到尋日突然爆升，今日仲頂得住，升少少，日線圖走勢仍然好靚，好大可能出現另一個上升旗形，回多少少可能再彈過㗎！所以，富仔覺得嚟緊魚缸上番25000應該係時間問題啫。趁呢個短暫嘅整固，富仔搵到兩隻心水股同大家開心「些牙」，分別係美團(03690)同中海外(00688)。

*監管重拳殺傷力減低*

　　美團，科技佬嚟喎，唔好啩？的確由舊年開始，阿爺係咁出「大技」，左一拳反壟斷法，又一拳連環約談，班科技佬接完一招又一招，好多都搞到腸穿肚爛、七孔流血，ATM三位大佬送晒入ICU搶救，百度(09888)、嗶哩嗶哩(09626)都要包到成個木乃伊咁，抖咗好耐先好番。嚟到新一年，班科技佬可能又要接招，只不過近排富仔發覺，阿爺出招好似無之前咁大殺傷力。
　　呢排阿爺出咗個水蛇春咁長嘅「關於推動平台經濟規範健康持續發展的若干意見」，簡單啲講係要規範平台企業投資入股金融機構，亦會加強對平台廣告、收費同產品誤導嘅執法。又嚟規範？咁咪好大鑊？咪住，今次都有「推動發展」嘅部分，提到支持平台經濟發展，希望平台企業加快人工智能同國際化發展。
　　之前科技佬跌完一鑊又一鑊，都係驚阿爺啲整改搞到佢哋無晒增長。科技佬無增長，又點樣鹹魚翻生呢？但係，今次阿爺畀嘅「意見」，講到明平台經濟發展都好緊要，希望畀到啲平台佬就住AI、國際化呢啲框架做得更好，等你都有啲空間發展下，唔係完全要打到佢哋「謝晒皮」，好似對科技佬釋出咗啲「善意」。
　　又咁講，1月份已經過咗近三個禮拜，暫時都未睇到阿爺再有重招對付科技佬，更何況上年已經出咗咁多招，富仔心諗科技佬都應該識do啦，免得再搞到阿爺唔高興，費事再次中伏。仲有，科技佬個價已經跌到好殘，心水清嘅朋友都應該知道:係時候要助佢哋一把啦！技術上嚟睇都係入手嘅好時機。當中，富仔發現美團係一個唔錯嘅選擇。

*美團監管風險逐步降低*

　　美團舊年因為判定為「濫用市場支配地位」嘅企業，判罰款34.42億銀人仔，全年都無乜好日子過。舊年第三季嘅成績表亦唔太靚仔，收入488.29億銀人仔，按年增加37.9%，好過平均預期嘅485.73億銀人仔。但係，公司淨虧損99.95億銀人仔，去年同期賺咗63億銀人仔，即係話轉盈為虧，仲差過預期嘅蝕70.42億銀人仔添。
　　美團接完呢一拳之後，睇嚟都知驚啦。董事長王興話過，支持加強監管餐飲外賣行業，相信可以幫到行業「健康有序發展」，而美團亦能夠喺公平競爭環境下營運。佢重申，已經執掂內部監管機制，仲寫包單話公司嘅營運做到反壟斷同市場競爭等監管要求。
　　另外，美團舊年第三季成績表咁差，某程度因為多咗外賣車手福利嘅開支。公司話，嚟緊會確保外賣車手嘅福利合規，富仔亦覺得隨住員工成本嘅增加，可能會將呢啲成本轉畀消費者，公司今年嘅盈利應該好番唔少，加上之前嘅罰款都係一次性，有晒之前犯錯嘅經驗，相信再有罰款呢啲額外開支嘅機會唔大。
　　
*美團回至228銀附近入貨*

　　咁可以點部署呢？睇美圖嘅日線圖，股價喺舊年11月中升到最高297.6銀，之後形成一條下降軌，更加有兩次裂口低開。不過，去到今年初第二次裂口低開後無再跌落去，開始逐步上升，尋日仲整咗支大陽燭，應該係時候要爆啦！今日尾段造番好，出現兩連陽，10天線升穿20天線，MACD快線都逐步拋離慢線，走勢嚟講幾好㗎。
　　富仔覺得嚟緊美聯儲議息結果，可能會對科技佬有啲影響，股價都會有少少整固，但係呢個整固相信會比較短暫。富仔會喺228銀附近先買入，初步目標睇舊年11月尾裂口低開前一日嘅低位260銀附近，買500股試試佢！

*中海外回至21.5銀可部署*
　
　　除咗科技佬之外，富仔覺得內房佬都好咗好多。大家相信都有留意到，不斷有消息指阿爺對內房佬「好人」咗啲，包括放寬「三條紅線」，畀優質房企可以買身陷困局嘅房企嘅項目、放寬房企預售資金使用等，而今個月一年期LPR都調低咗10基點，似乎成個氣氛同上年唔同晒。加上有「孖屐」人士講過，神州樓價跌咗唔少，阿爺都要諗下內需疲弱嘅問題，唔可以再令到房企冧落去，令到房企暫時「鬆一口氣」。仲有，同科技佬一樣，內房佬跌到殘晒，好多隻估值已經平到爆，趁阿爺鬆啲手，要快趣啲入手啦，優先留意啲有阿爺十卜嘅內房佬。
　　阿富就覺得中海外(00688)本身質地唔錯，市盈率只係4.765倍，低過同係國企嘅潤地(01109)，抵博啲。睇公仔圖，中海外今個月初，一路沿10天線升上去，但近三日喺22個半樓上似再整固。富仔會等股價落番21.5銀買入，目標睇舊年7月嘅頂位24.07銀，跌穿19.9銀先至止蝕走人，同樣買500股試試佢！

　　　　　　　　　　　　　　　　　　　富仔依家個倉**: