《古臣周記－古臣》公用股逆市都捱沽，無咗避險作用？

　　對於一個初初學買股票嘅投資者嚟講，業務同派息都比較穩定嘅公用股係唔錯嘅選擇。不過，呢排有個別公用股派成績表，有盈利倒退，亦有由盈轉虧，一啲有穩定收租業務嘅房託亦受本地社會事件牽連。公用股走勢落後，仲唔知跌完未，阿臣真係大跌眼鏡。唔通公用股用嚟避險嘅作用已經無咗？孖屐前景仍然唔明朗，公用股仲買唔買得過？

＊業務及派息穩定，仍可長線投資＊

　　要回答呢個問題，先講下公用股有咩特性。一般公用股擁有地區壟斷嘅民生相關公共事業，收入穩定同有充足嘅現金流，加上有穩定嘅派息政策，吸引唔少人用嚟長線投資。因此，每當孖屐恐慌情緒上升，呢啲相對穩定嘅公用股可以暫時成為資金嘅避險處。除非遇上經濟衰退或大跌市，唔係嘅話轉投公用股會著數過揸黃金，因為後者係無息收嘅。
　　換言之，即使公司發咗盈警，以至業績倒退，只要長遠基本業務仍然維持平穩增長、現金流無點受到影響，同埋維持派息嘅話，仍然可以趁低吸納嚟長揸。

＊中電盈利料受利潤管制政策所限＊

　　先同大家睇下隻今年上半年由盈轉虧嘅中電（００００２）。公司期內錄得９﹒０７億銀虧損，舊年同期就賺７４﹒３６億銀。第二期中期股息每股０﹒６３銀，管理層表示，有信心維持穩定派息。
　　中電錄得虧損主要因為澳洲業務商譽減值而由盈轉虧，但由於係非現金項目，所以唔影響公司現金流，派息同樣有穩定增長。不過，受香江舊年十月生效嘅「兩電」利潤管制協議影響，加上澳洲業務收入減少，集團上半年嘅現金流量按年下跌逾三成七。管理層亦預料，澳洲新嘅電價規管機制已喺今年七月生效，將直接影響下半年嘅盈利。
　　睇嚟中電基本業務盈利因為地方政策（香江同澳洲嘅利潤管制協議），面臨下滑嘅風險，就算保持一樣派息，缸友都可能有賺息蝕價嘅風險，因為股價走勢未必會好靚仔！

＊若社會氣氛改善，港鐵望續向上＊

　　另一隻盈利倒退嘅係港鐵（０００６６），上半年純利按年下跌逾兩成二，維持中期息０﹒２５銀。拖累業績嘅主因係公司需為旗下沙中線紅磡站同屯馬線，以及米字國業務作出超過２４億銀嘅撥備。由於沙中線嘅最終嘅法律責任誰屬，同埋具體支出仍未確定，未來用唔用得晒啲撥備，或者需唔需要再增加都未知，呢方面係一個隱憂。
　　除咗地鐵車務，佢亦有一半喺地產業務，公司預期「日出康城」第五期同第七期商場視乎進度喺下半年入帳，有機會抵銷返上半年嘅撥備。另外，當前社會氣氛緊張，孖屐憂慮連串示威事件會影響港鐵日常車務，甚至旗下商場嘅生意，拖累佢嘅股價。近日孖屐氣氛轉好，佢反彈力度都幾強，顯示缸友對佢前景都有信心。不過，港鐵今年累計升幅超過兩成，目前息率都係得２﹒４８厘（詳見下表），加上重返早前高位仍面對阻力，買嚟收息兼賺價嘅吸引力又爭少少。

＊煤氣內地業務受到人仔貶值影響＊

　　講到揀公用股，阿臣就推薦業務前景相對明朗兼年年十送一紅股嘅煤氣（００００３）。公司噚日啱啱公布業績，上半年純利按年下跌近一成九，中期息維持１２仙。雖然本地煤氣業務銷售因為餐飲業需求放緩而下跌，但營業額佔比較高的內地燃氣業務就有增長。公司指出，內地積極推動天然氣使用，令集團相關業務得以持續受惠。不過，要留意番隨住人民幣下半年料繼續走弱，將對集團盈利造成負面影響。
　　煤氣股價喺績前已被炒起，放榜後今日（２１日）沽壓都幾大。但見到神州同花旗國嘅貿易戰仍然膠著，加上本地政局難以喺短期內解決，孖屐唔明朗因素都大，阿臣認為，煤氣仍然具備避險能力，而且隨著股價下跌，息率都上返２厘，所以阿臣個倉計劃趁佢回調至１６蚊邊，買入一手１０００股。

　　表列本地公用股息率比較：

　　股份　　　　　　　　　　　　　　　　現價（升跌幅％）　　　　　　　　息率
　　－－－－－－－－－－－－－－－－－－－－－－－－－－－－－－－－－－－－－－－－
　　中電　　（００００２）　　　　８２﹒２５銀（－０﹒４８）　　　　３﹒７２０
　　煤氣　　（００００３）　　　　１６﹒３６銀（－４﹒３３）　　　　２﹒００９
　　　　　　　　　　　　　　　　　　　　　　　　　　　　　　　　　（未計十送一紅股）
　　電能實業（００００６）　　　　５４﹒０５銀（－０﹒８３）　　　　５﹒１７６
　　港鐵公司（０００６６）　　　　４８﹒３０銀（－０﹒７２）　　　　２﹒４８２
　　長江基建（０１０３８）　　　　５６﹒２０銀（＋０﹒０９）　　　　４﹒３２４
　　港燈　　（０２６３８）　　　　　７﹒７４銀（無升跌）　　　　　　４﹒６５９
　　香港電訊（０６８２３）　　　　１２﹒９０銀（＋０﹒６２）　　　　５﹒３６３
　　－－－－－－－－－－－－－－－－－－－－－－－－－－－－－－－－－－－－－－－－
　　註：資料截至今日１１：１５ａｍ


　　表列截至８月２１日（１１：１５ａｍ止）阿臣投資組合表現：

　　股份　　　　　　股數　　　　　平均買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　金界　　　　　２０００股　　　９﹒６５元　　　　１１﹒０４元　　　　２２０８０元
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　：　２２０８０元
　　剩餘現金　　　　：１３６２５０元
　　組合淨值　　　　：１５８３３０元
　　組合本月收益表現：　－０﹒７０％（截至上月底止組合淨值：１５９４４４元）
　　組合累計收益表現：＋５０﹒７９％（本金１０５０００元計）（２０１６年８月開倉）
　
　　＊數據截至今日１１：１５ａｍ