內房好消息傳咗一日就落地，今朝中央幾個部門一齊開會，住建部、金融監管機構、地方政府和國有銀行等等排排坐，到晏晝就組合拳推出幾項樓市新政。
其中第一、國務院宣布，商品房庫存多嘅城市，當地政府可以酌情以合理價格收購部分商品房作為保障性住房。第二、人民銀行宣布取消全國層面首套住房和二套住房商業性個人住房貸款利率政策下限，首套住房首付比率降至15%，二套住房首付比率就降至25%。第三、人行同時宣布個人住房公積金貸款利率下調0.25個百分點。
其中國務院提到嘅容許地方政府以合理價格收購商品房，正正就係噚日開始吹風嘅一段，地方政府終於獲得自己救自己嘅權限，雖然地方政府未必水源充足，但起碼可以出手分攤風險，比起之前一路都堅持市場自救嘅政策方向已經有所唔同。
假如地方政府真係銀彈唔夠，噚日傳緊嘅料入面，地方國企收購存量房嘅前提，就係要由國有銀行提供貸款資金。所以目前內銀的確係等錢使，阿爺開到口，想必地方政府即將就會嚟到內銀門口敲門借錢。
今日熱話除咗內房之外，仲有平保(02318)世紀減持大笨象(00005)。繼上個禮拜平保減持564萬股套現3.92億銀之後，今日《彭博》報道，平保已經度緊要點樣再沽大笨象，甚至據報已經派人遠征中東搵接盤俠，希望可以批量一次過套現。呢條消息今日就震一震隻象，不過大笨象高位仲係夠穩陣，今日最終都係回咗2%。
平保今日都有回應，揸滙控係長期投資，而滙控喺亞洲一直保持獨特競爭優勢，對長期發展有信心。以字面睇應該就可以排除平保要沽清滙控嘅諗法，減持只係為咗套現。而平保身為國企背景嘅金融機構，要幫手借錢畀地方政府都係大有可能，所以減持大笨象，可能都係準備未來借錢畀地方政府做定現金準備，點會真係咁小氣「拆象」唔成就沽佢？請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】辭任終院法官撰文指本港法治受干預，政府反駁強調不受政治壓力，你是否支持政府回應？► 立即投票
38,712.77
