《小傳日記》２０２３年上半年咁就過咗，好似好充實咁，但其實又得唔到啲咩。好似睇韓
國女團咁，過程好精彩悅目兼悅耳，但過後你唔會記得邊首打邊首，除非你係韓迷！
下半年係咪有轉機？唔知。因為全球政經局勢時刻在變。俄羅斯兵變事件會唔會促成俄烏戰
事結束，緩解歐洲能源危機？美國聯儲局個龍門搬完未？依家講定會再加息兩次（每次２５基點
），假如７同９月都加息，會唔會到時又再上調聯邦基金利率目標上限？
尋日公布嘅首季ＧＤＰ終值，按季增長２％好似好勁，但其實政府開支佔０﹒８５個百分點
，撇除之後即係增長１﹒１５％，仲有私人本地投資降低ＧＤＰ２﹒２２個百分點，即係全靠個
人消費開支嗰２﹒７９個百分點撐住，但美國企業舊年已經開始裁員，依家ＡＩ開始盛行，如果
仲係有工無人做，唔排除啲企業決心放棄真人，盡量用電腦或者機械人做。
吹完水，望吓有咩仲落得手炒吓。發現隻中國重汽（０３８０８）今日上破今年以來嘅橫行
區頂，升幅超過５％，高位１５﹒２６銀係２０２１年８月２０日以來最高。有咩因素支持股價
上升？資料顯示，２０２３年５月，內地重卡市場整體銷量７﹒７４萬輛，中國重汽佔咗
２﹒０１萬輛或接近２６％，繼續穩坐榜首。今年頭５個月，中國重汽累計銷售重卡１０﹒８８
萬輛，是榜單上唯一銷量突破１０萬輛嘅商用車企業，成為上半年重卡銷量冠軍。
大摩６月１２日發報告指，畀中國重汽增持評級，目標價１８銀，行業前景吸引，相對於今
日收市價１５﹒２２銀仲有超過１８％升幅，公司末期息派０﹒３３銀，７月４日即係下星期二
除淨，收埋息話，潛在回報超過兩成。今日重汽幾乎可以典型嘅大陽燭收市，但已經好勁，要買
都唔會預佢回好多，１５銀可以買，比較理想係１４﹒８銀買，目標望住大摩價１８銀先啦！請
請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】政府宣布垃圾徵費暫緩，未來將繼續推廣回收及減廢，你認為幾時先係垃圾徵費嘅時機？► 立即投票
