《魚缸博客》３月係業績期，每日都有唔少上市公司派成績表。昨日收市後有兩隻賭股美高
梅（０２２８２）同永利澳門（０１１２８）公布業績。美高梅舊年純利約２６﹒４億元，
２０２２年度虧損５２億元。永利舊年純利１１﹒７億元，２０２２年度虧損７３億元。雖然兩
家企業都同時虧轉盈，不過股價表現卻大不同。
今日遭逢港股跌市，恒指一度跌超過５００點，但美高梅今日股價仍然可以保持上升，最多
升４％。永利喺執筆時已經下跌，最多只升過１％左右。股價走勢迴異，必然有因。
比較兩家企業喺疫情前即２０１９年純利，永利年賺５０﹒５６億元，而美高梅年賺
１９﹒３１億元，相差巨大，永利比美高梅多出１﹒６倍幾，而永利舊年純利卻只得美高梅一半
都唔夠。可想而知，四年疫情嘅打擊，永利相對來講處於劣勢。當然，永利都唔算差，起碼叫做
有錢賺，澳博（００８８０）舊年都仲要蝕錢。
而家內地經濟環境表面上有增長，但消費力大不如前，睇香港嘅名牌銷售大概亦略知一二。
要返去之前嘅高端消費模式係有點難度。所以，賭業股暫時並唔係特別吸引，若想趁美高梅績優
短炒，都唔好太貪，最多去到１４至１５元就好走人。（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》講述被情緒困擾真實個案，情緒病最終如何走出低谷？► 即睇
