《經濟不停學》紐油？布油？原油大解構！
01/06/2020
國際原油價上月曾跌落負數，全球嘩然！係咪去油站可以入平油？究竟國際原油有幾多花款？紐油同布油有咩分別？點解布油油價會比紐油貴啲？今日就同大家輕鬆講油價！
（Shutterstock圖片)
1.國際原油兩個價，紐油布油要搞清！
國際油價主要分為兩個：紐約油同布蘭特油。由中東、非洲輸往西方，以及在歐洲海域開採嘅原油都會以布蘭特原油定價，同石油輸出國組織（OPEC）嘅油價指數有一定關係。
（Shutterstock圖片)
至於美國、墨西哥同阿根廷出產嘅油就以紐約原油訂價，其中美國「頁岩油」出產量左右紐約原油價格升跌。喺美國嘅地底深沉有好多「頁岩」，而呢啲頁岩層入面蘊藏大量石油同天然氣，可以利用「高水壓裂岩」技術，將入邊啲油榨出嚟。無論中東開採出嚟，定係美國啲「石頭」榨出嚟，都屬於輕硫原油，要經過提煉先可以用到！
點解布油油價通常比紐油高啲？普遍認為，上個世紀美國政府對原油出口落禁令，令紐油成為封閉市場，受美國國內需求而影響價格，加上美國頁岩油成本低、產量大，所以令到紐油平啲，可以係國際市場「頂爛市」啦！
2.油價跌落負數，芝商所始作俑！
紐約原油主要喺芝加哥商品交易所做交易，並以期貨買賣方式進行。交割方式主要有兩種：從買方油井泵送到指定賣方管道或者儲油設備；買方向賣方轉讓擁有權，就無需實物交割。
（Shutterstock圖片)
其實咁耐以來，油價都未試過負數，最多都係跌到零；如果買家唔要就違約，最多都係打官司咁解決。但係今年4月15日，芝商所就突然改例，允許油價跌落負數；芝商所董事話調整係希望嗰班唔想接貨嘅人可以有「逃生門」離開市場，但係估唔到油價一跌就無底深潭。
3.香港油價加快減慢，因為唔跟國際油價？
不論紐油或布油，佢地都係屬於「原油」，仲要經過提煉先可以變「成品油」。由於香港無煉油廠，所以跟國際原油價格買賣的話，一來未必反映到個價格成本，二來走勢十分波動。
（Shutterstock圖片)
香港政府最後選擇以「新加坡無鉛汽油和車用柴油的離岸價」（即普氏平均價）去調整本港汽油價格，因為比較貼近成品油走勢。但近期國際油價就算幾波動都好，新加坡嘅油價都係「不動如山」，好處就係穩定；但係近年油價跌完又跌，但總唔見油站入油價下跌，做車主又有乜辦法唔嬲！
（Shutterstock圖片)
國際油價經常同股市、黃金期貨等有密切關係，醒目嘅你，今日係咪知道更多原油小知識呢！
撰文：李皆穎
【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！
立即下載>>
etnet財經﹒生活App
iOS : https://apple.co/2PCaN4b
Android: http://bit.ly/38h135T
etnet MQ強化版App
iOS : https://apple.co/2VEjoHl
Android: http://bit.ly/32RGk7G
【與拍賣官看藝術】常玉作品屢創天價，背後其實藏著跌宕起伏的人生► 即睇
