《小傳日記》ＱＱ見底獲追捧，魚缸由低向上衝！

　　香江噚日（２０日）急插５３１點或跌２巴仙，收２５８４０，三連升宣布Ｇａｍｅ－ｏｖｅｒ，仲插穿埋條十天線，嗚哇！花旗國「孖屐」隔晚大插水，缸友們對全球經濟Ｓｌｏｗ－ｄｏｗｎ好擔心油價急跌，香江今日（２１日）低開３４３點報２５４９６點，最低見過２５４９４點，喺ＱＱ（００７００）有缸友撈底，帶動香江跌勢大幅收歛，更由升轉跌，尾市更高見２５９９８，全日走高１３１點，升幅半個巴仙，收報２５９７１，修復返條十天線（約２５９３８點），廿天線（約２５６７９點）失而復得，主板成交近７８３億銀增加逾１巴仙。國貨收報１０４８６點，升１９點。滬指就收報２６５１點，漲５點。
　　香江重磅藍戰士今日普遍走高，ＱＱ噚日急挫超過３巴仙後，今日初段見過２７７銀低位後重現雄風，最終倒升近３巴仙，報２８９﹒６銀，收復埋１０天線（約２８３﹒０８銀），好叻仔啊！ＡＩＡ（０１２９９）跟升１巴仙，報６３﹒４５銀。大象（００００５）同生發發（００３８８）就微微揚起唔夠半個巴仙，分別報６５﹒３銀及２２５銀。祖國移動（００９４１）就無咁好彩，唔得缸友歡心，全日跌低超過１巴仙，報７５﹒５銀，穿埋五十天線（約７５﹒７４４銀）。慘！

＊油價急走低三桶油閉翳，航空佬漸甦缸友齊捧高＊

　　花旗國「孖屐」兼國際油價隔晚急急走低，缸友擔心對全球經濟ｓｌｏｗ－ｄｏｗｎ嘅情況會加劇，「三桶油」今日變咗三隻可憐大豬，中石化（００３８６）走低超過１巴仙，報６﹒５９銀，穿廿天線（約６﹒５９２銀）；中石油（００８５７）跟跌２巴仙，報５﹒４３銀；中海油（００８８３）亦好ｄｏｗｎ，最低見１２﹒３８銀，全日仆低逾２巴仙，報１２﹒７２銀。
　　國際油價走低，航空佬個個喺天空中自由翱翔，屐飛（００２９３）只係飛起半個巴仙，報１０﹒８８銀；東航（００６７０）走高１巴仙，報４﹒７９銀；國航（００７５３）同南航（０１０５５）揚約２巴仙，分別報７﹒４１銀同５﹒２６銀。

＊長和失大刁長實慘中招，人行續收水內銀卻進取＊

　　長和系喺袋鼠國一單收購天然氣管道資產嘅大「刁」慘被當地政府請食檸檬，認為呢單「刁」唔符合國家利益。雖然唔係咩好消息，但長建（０１０３８）諗住將喺米字國嘅公用資產賣畀一家準上市公司，大和都力撐話，呢個做法可以降低嗰邊嘅政治風險。喺大和唱好下，長和系今日都只係個別發展，一號仔長和（００００１）跌咗約１巴仙，報８０﹒８５銀；電能（００００６）腳軟唔見咗約半巴仙，報５３﹒２銀；長建就最有追捧，升咗半巴仙，報５７﹒８銀；長實（０１１１３）就慘Ｄ，跌咗近２巴仙，報５３﹒８銀。
　　Ａ場呢排都係冇乜好消息，加上人仔又持續腳軟，人行已經第１９個交易日收水冇逆回購操作，亦同時連續１２日冇搞公開「孖屐」操作。一班內銀朝早都仲冇乜精神，但到咗下晝尾市魚缸開始倒升，連帶炒起唔少內銀，郵儲行（０１６５８）就最巴閉，彈起超過１巴仙，報４﹒６１銀；招行（０３９６８）都彈起近１巴仙，報３１﹒６５銀；農行（０１２８８）、工行（０１３９８）同中行（０３９８８）都升咗超過半巴仙，分別報３﹒５銀、５﹒４３銀同３﹒３８銀；建行（００９３９）跳起兩格報６﹒５銀。

＊野村褒濠賭股價高高高，德銀講兩句內房有期許＊

　　大行野村幾時都睇高馬交佬一線，佢地話雖然上個星期格蘭披治大賽令到賭場生意少咗，但係對於花旗國上市嘅馬交佬睇好，認為係高增長潛力股。今日大部分馬交佬都反一反彈，買定離手。銀娛（０００２７）漲近４巴仙，報４６﹒７５銀。新濠（００２００）升逾５巴仙，報１４﹒２６銀。澳博（００８８０）漲逾１巴仙，報６﹒７３銀。永利馬交（１１２８）升近２巴仙，報１６﹒４６銀。金沙（０１９２８）漲逾１巴仙，報３２﹒２銀。美高梅（０２２８２）升近４巴仙，報１２﹒０８銀。
　　德銀呢期睇見內房都無乜精神，所以都講兩句鼓勵下佢，分析師話依然睇好神州地產業，認為現時估值已反映市場對行業未來一年潛在售價及去化率下降的因素，人話嚟講即係見底咁解！部分內房都ＧｏＧｏＧｏ，「四條三」恒大（０３３３３）飛起逾５巴仙，報２１﹒４銀；碧桂園（０２００７）升近５巴仙，報９﹒６８銀；融創（０１９１８）走高近４巴仙，報２６銀；龍湖（００９６０）升逾１巴仙，報２２銀。

＊雅生活反彈物管價唔爛，汽車經銷商個個爭住搶＊

　　其實個市咁Ｃｈｏｋ，買返多少穩定啲嘅股份避險好緊要，物管好似好多人選擇咁款，貪佢收入穩定嘛！雅生活（０３３１９）今日升近２巴仙，報９﹒８５銀；碧桂園服務（０６０９８）升近６巴仙，報１２﹒０４銀；彩生活（０１７７８）升逾３巴仙，報４﹒１５銀；綠城服務（０２８６９）漲３巴仙，報６﹒２６銀。
　　另外，唔知係咪近來神州經濟開始好轉，唔通個個都再想換車？汽車經銷商股部分略見反彈，例如廣匯寶信（０１２９３）今日急彈近１３巴仙，報２﹒３銀；耀萊集團（００９７０）飛起５巴仙，報０﹒３１５銀；潤東汽車（０１３６５）亦炒起近５巴仙，報２﹒６７銀；正通汽車（０１７２８）升近６巴仙，報４﹒２２銀；大昌行（０１８２８）都有近１巴仙進帳，報２﹒９４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。