阿臣上個星期先話可以抽下嘅百威太亞（０１８７６），因為多個原因而取消上市計劃，成為香江歷來最大宗新股擱置，咁大單ｂａｄ ｎｅｗｓ，魚缸走勢當然要走樣啦！星期一（１５日）最多急跌過４００點，不過神州當日公布第二季ＧＤＰ合預期，一下將魚缸拉返上條廿天線上，不過成交一路縮減，投資氣氛認真麻麻。
睇魚缸恒指現時二萬八關會有支持，呢兩個星期阿臣諗，要等聯儲局月底揭曉議息結果，魚缸先可能有明確方向。上個星期儲局主席鮑叔叔（鮑威爾）已經連環放鴿，不過睇真啲其實有部份「孖屐」人士認為現時未必需要減息，而對上兩次聯儲局開始減息周期都以半厘為起點，唔知今次會如何呢？
＊格老：資本投資下降，預算赤字極度失衡，花旗正走向滯脹＊
「孖屐」講減息都講咗好耐，但鮑叔叔時時轉口風，大家都好難捉到路。反而，阿臣對儲局前主席格老（格蘭斯班）講過嘅一個現象－－滯脹（Ｓｔａｇｆｌａｔｉｏｎ）有興趣啲。有留意格老嘅訪問都知道，佢老人家喺三年前就一直話滯脹將會來臨，最近一次就喺今年２月再講到。
講格老點睇之前，不如等阿臣講吓咩係滯脹先。其實滯脹曾經喺上世紀七十年代末嘅花旗國出現過，當時花旗國經濟受石油危機拖累，出現經濟持續低增長，油價亦影響到通貨膨脹徹底失控，即係經濟停滯伴隨通脹高企。有見及此，時任聯儲局主席伏克爾（Ｐａｕｌ Ｖｏｌｃｋｅｒ）曾經將息率調高到十厘，旨在令物業價格回落，但由於令經濟失去動力，所以除咗貨幣政策，當局同時以財政政策好似減稅嚟令到經濟重拾增長，終於持續到八十年代末呢個問題先得到解決。
好啦，咁格老點講呢？佢就話其實自２００８年金融海嘯以來，就見到花旗國資本投資大幅下降同生產率顯著減速，加上花旗國預算赤字處於極度失衡嘅狀況，如果將來醫保、福利等相關嘅支出多過私人投資，亦會損害花旗國經濟增長。
花旗國６月份政府赤字達８０億美金，比「孖屐」預期６３﹒５億美金為多，格老之前就話過，當預算出現嚴重赤字，將會引發通脹，滯脹就會開始。另外，缸友都要留意埋花旗國會喺最快九月上旬觸及舉債上限嘅步新聞，現時財長努欽（Ｓｔｅｖｅｎ Ｍｎｕｃｈｉｎ）同眾議院議長佩洛西（Ｎａｎｃｙ Ｐｅｌｏｓｉ）已經就來年財政年度，調高債務上限同限制支出討論，希望達成共識，避免出現債務違約危機。
不過，缸友可能會諗，現時花旗國嗰邊２巴仙通脹嘅目標仲未達到，將來會出現滯脹嘅論調可能站唔住腳。阿臣認為，中美貿易戰點發展都可能會同通脹有關係，若然加徵關稅嘅動作持續，咁最終消費者都要負擔關稅而出現通脹，同時因為貿戰打擊經濟增長，再夾埋格老講嘅事，滯脹其實真有可能發生都未定！
＊百威亞太擱置上市，資金望回流港股上望二萬九關＊
美股三大指數連日創新高，不過恒指即使噚日（１６日）錄得五連升，升勢仍然疲弱，五日累漲只有５０３點，成交又未見配合。早前「孖屐」就有論調話資金泊入百威亞太，但呢隻魚毛上星期六（１３日）公布擱置上市，如果呢個論調成立，相關資金應該會回流魚缸，短期應該有上升動力啩？現時魚缸睇住二萬九呢個關口先啦。至於個倉金界（０３９１８）果然不負眾望，呢個星期抽上１０銀樓上，補晒四月嗰陣嘅下跌裂口（１０﹒２３５銀至９﹒７７５銀），走勢咁靚，阿臣就繼續放下紙鳶先囉！
表列截至７月１７日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ４０００股 ９﹒６５元 １０﹒７６元 ４３０４０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ４３０４０元
剩餘現金 ：１１２５８１元
組合淨值 ：１５５６２１元
組合本月收益表現：＋ ３﹒１５％（截至上月底止組合淨值：１５０８７０元）
組合累計收益表現：＋４８﹒２１％（本金１０５０００元計）（２０１６年８月開倉）
＊數據截至今日１１：００ａｍ
etnet健康網購 | 6月限定優惠【送：明目藍莓精華36:1】乙樽► 火速行動
