《小傳日記》魚缸無驚險，等緊簽貿議；內房佬出色，油佬亦招積！

　　「孖屐」今日（９日）走勢靠穩，大家都等緊中美兩位大佬，可唔可以喺禮拜日（１５日）新一輪關稅徵收之前，達成首階段貿易協議，所以缸友們唔多肯落場咁，老虎蟹都等埋呢個禮拜之後先出手。個股方面，今日內房佬領軍，「四條三」恒大（０３３３３）派息夠晒和味，加上有大行唱好，拉升整體板塊；另外油組決定減產帶動油價造好，加上神州管網公司成立，「三桶油」都似乎有返起色。大隻佬指數只係窄幅走數，高見２６６１８點，低報２６４３２點，上下波幅１８５點，最終收報２６４９４點，跌３點，主板成交６５０億銀減少約一成半。國貨報１０４０８點，升不足１點。
　　神州Ａ場都一齊觀望，上證收報２９１４點升２點，深證成分指數收９８７６點跌２點，兩市成交金額合共４６０８億銀人仔。
　　大隻藍戰士方面，大象（００００５）微漲近半巴仙，報５７﹒７５銀；生發發（００３８８）跌唔夠半巴仙，報２４６﹒８銀；ＱＱ（００７００）靠穩升６亳子報３３６﹒２銀；中移動（００９４１）抽高逾１巴仙報６０銀；ＡＩＡ（０１２９９）跪低近半巴仙，報７７﹒６銀。

＊磚頭被吹奏通通向上走，油管網現身油佬向上伸＊

　　大行花旗睇好神州磚頭佬，話佢哋今年１２月樓盤銷量好過預期，同埋阿爺開始對佢哋鬆綁，估計算佢哋會炒到出年首季，磚頭佬今日自然炒到熱辣辣。今日恒大（０３３３３）派蚊幾息，揸住嘅缸友自然春風得意，個價一度高見２０﹒４５銀，埋單升兩格報１９﹒７４銀；融創（０１９１８）踼高逾４巴仙，報４２﹒８銀；新城發展（０１０３０）鏟高逾４巴仙，報９﹒０８銀；富力（０２７７７）飆６巴仙，報１３﹒３４銀；潤地（０１１０９）起哄近２巴仙，報３５﹒９銀。
　　神州油氣管網公司今日掛牌，日後負責推進資產評估劃撥、運銷協調等工作。身為股東嘅「三桶油」同其他油佬升勢當然夠牙力。中海油（００８８３）微升一格報１１﹒３２銀；中石化（００３８６）升逾１巴仙，報４﹒４銀；中石油（００８５７）走高逾１巴仙，報３﹒６３銀；中海油服（０２８８３）進帳一格報１０﹒５２銀。
　　
＊豬價向下倒豬肉佬跌到，金風有貨到風電股上掃＊

　　神州商務部數據顯示，豬肉佬價格已經連續４周下跌，豬肉佬當然無運行啦！萬洲（００２８８）插水近４巴仙，報７﹒９８銀；中糧肉食（０１６１０）跪低逾１巴仙，報２﹒４６銀；雨潤食品（０１０６８）蒸發接近４巴仙，報０﹒８銀。惠生（０１３４０）逆漲近９％，報０﹒１３４銀，但成交唔多九萬銀都唔夠；普甜食品（０１６９９）跟升逾３巴仙，報０﹒３０５銀。
　　神州有傳媒話，金風（０２２０８）已經向袋鼠國北部一個金礦Ａｇｎｅｗ礦交付咗第一批渦輪機部件，搞到其他風電佬都生猛哂。金風炒高近３巴仙，報８﹒６３銀；華電福新（００８１６）並跳高近３巴仙，報１﹒５８銀；龍源電力（００９１６）踼高近１巴仙，報４﹒６２銀；新天綠色能源（００９５６）鏟高近２巴仙，報２﹒１８銀；大唐新能源（０１７９８）炒高近３巴仙，報０﹒７８銀。

＊藥價恐續降藥佬好沮喪，出貨量風騷丘鈦兩年高＊

　　醫藥佬近排接二連三受到神州政策嘅衝擊而不斷插水，而最近就有神州媒體放風話，第三輪藥品帶量採購最快會喺半個月到兩個月之後開始競標，亦即係納入新一輪採購嘅品種會愈嚟愈多，而呢個政策旨在令神州更多缸友可負擔得起藥價，會搞到藥價不斷降低，藥廠自然收入少咗，股價仲點會有運行。石藥（０１０９３）蒸發逾半成，報１７﹒０２銀；中生製藥（０１１７７）就插近半成，報１０﹒１２銀，兩者都係跌幅頭兩大嘅藍戰士同國貨佬，慘！三生製藥（０１５３０）蒸發超過４巴仙，報１０﹒７０銀。石四藥（０２００５）跌近３巴仙，報５﹒９５銀。綠葉製藥（０２１８６）唔見超過２巴仙，報５﹒５６銀。
　　上星期爆升嘅手機設備佬，今日就開始見腳軟，丘鈦（０１４７８）上月鏡頭出貨量勁升六成六，朝早一度炒高超過３巴仙，高見１２﹒８２銀創近兩年高，但埋單升幅縮至一格報１２﹒４４銀。瑞聲（０２０１８）上星期勁彈近一成三後，今日回吐近半巴仙，報６１﹒７銀。舜宇（０２３８２）就高見１４３﹒２銀兼創１６個月高，埋單僅彈起逾１巴仙，報１４０﹒３銀。富智康（０２０３８）蒸發近４巴仙，報１﹒３６銀。請請！
　　　　　　　　　　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。