今日係6月份，亦係2022年上半年最後一個交易日，原本以為外面打風啫，點知美帝就趁香港七一回歸25周年紀念日前玩嘢，新增5間中國企業列入制裁名單。中美角力下，買科技股都係危，反觀整體車股喺過去一同三個月升咗超過13%同14%。今朝咁啱又見吉利(00175)企喺恒指升幅榜第二位，升幅4.34%。煤炭股雖然喺過去一年升成135%，但係最近5個交易日累跌1.9%，表現係所有類別之中最差，加上市場擔心環球央行持續加息最終會引發經濟衰退，到時油價亦會大跌，資源類股份隨時已經見咗頂。
車股冇喺舊年以嚟嘅監管風暴中受到太大衝擊，依家更加話要以汽車行業拉動經濟。與其唔知揀邊間汽車製造商，不如揀銷售代理，食多家茶禮！永達汽車(03669)可以留意。公司主要喺內地通過其4S經銷店從事汽車銷售、提供售後服務、分銷汽車保險產品同汽車租賃服務。另外，根據集團舊年底嘅業績公告，公司已經得到AITO、小鵬、比亞迪、長城歐拉、零跑等頭部新能源品牌的門店授權。舊年公司亦相繼落成咗寶馬I-Space、I展廳；沃爾沃新能源城市中心店；大眾ID Store；凱迪拉克新能源城市展廳，並進一步開展寶馬、保時捷、奧迪、奔馳、沃爾沃、通用等傳統汽車品牌嘅新能源車型銷售同服務業務。
集團又話，舊年在「雙碳」基調下，新能源汽車銷量出現爆發式增長，喺自主同新勢力品牌嘅推動下，市場滲透率快速提升。集團估計整體新能源汽車市場將會保持較長一段時間嘅快速增長。舊年公司營業額按年增長14.2%，超過779億人仔，股東應佔溢利按年增長52.6%，有近2.5億人仔，而且穩定派發末期息(從來唔派中期息)，舊年末期息56.389港仙，預期周息率有7.5厘。
永達股價喺4月尾跌到5.57銀之後回升，6月頭升到8.83銀，雖然之後冇力再上，噚日仲低見7.32銀，但仍然保持4月尾以嚟嘅一浪高於一浪走勢，100天線亦未穿。從周線圖睇，股價6月初上破20周線後進行回調整固，7個零呢啲位置都係明顯嘅技術支持位，短線可以喺7至9銀炒住上落先，但中線以11銀為獲利目標。永達汽車價細，容易上車，否則幾好都係有得睇冇得食！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
42,091.43
5,706.53
