RSS訂閱 花旗國侵侵同北韓肥仔恩過去兩個交易日搞到環球魚缸風聲鶴淚，而呢兩位狂人依然非常硬頸，侵侵仲話花旗國嘅武器已經「ｒｅａｄｙ好晒」。雖然魚缸都已經暫時將呢啲不利因素消化咗唔少，但花旗國嗰邊有官員話，朝鮮嘅核攻擊能力已經今時唔同往日，兩國開拖嘅機會亦都較以前高咗唔少，即係魚缸仲有可能會因為咁而再插水。
講返香江呢邊，今朝魚缸展開報復式反彈上返二萬七，但依然有唔少板塊繼續唔上唔落，神州環保佬今年以嚟都相當頹，工業廢料處理一哥東江環保（００８９５）最運滯，喺三月上到去今年以嚟最高位１３﹒８６銀後就開始潛水，喺上個禮拜五仲要創埋近一年半新低，低見
１０﹒２２銀，加加埋埋都跌咗超過２６巴仙。
老老竇竇，東江環保業績其實都好省鏡，今年第一季多賺２３巴仙至超過１億人仔，早排仲發盈喜，話上半年起碼多賺兩成，至２﹒４７億人仔。雖然績靚，但缸友早排對盈喜都冇乜反應，加上成交持續縮水，股價表現自然冇乜睇頭。
東江環保今年預測市盈率都係得１２﹒４４倍，其他環保大佬光大國際（００２５７）同北控水務（００３７１）都有１３﹒６倍同１４﹒４６倍，估值明顯跑輸一條街。而東江環保將會喺呢個禮拜五（１８日）放榜，若然盈利增長有兩成半以上，相信都可以吸引返啲資金部署，加上跌勢亦有喘穩跡象，不妨諗諗小注買入走一轉。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》講述被情緒困擾真實個案，情緒病最終如何走出低谷？► 即睇
