RSS訂閱 中美貿易紛爭續困擾華爾街股市，加上歐盟今日（２２日）起對美國貨實施報復性關稅，美股噚日（２１日）全線向下，道指跌１９６點，報２４４６１點。魚缸呢邊今朝低開８０點報２９２１５點，失守俗稱「牛熊線」的２５０天線，之後仲曾經低見２９０８９點，創今年新低，二萬九關勢危，後市走勢令人擔心啊。
暫時唔好提Ｄ傷心事，不如睇吓今朝成功跑出嘅東方表行（００３９８）先喇。呢條魚毛噚日收市後，就公布咗截至３月３１日止年度嘅業績，全年純利１﹒３９億元，按年增加近７﹒４７倍，非常厲害！每股盈利２４﹒３２仙，派末股息８仙，兼有特別息１５仙，缸友們就當然ＨＡＰＰＹ喇。期內收入為２８﹒９２億元，不過就按年減少７﹒９８％。毛利收入為６﹒０７億元漲逾１９﹒４％，毛利率增長至２１％，勁！
雖則業績靚靚，佢今朝一開波就衝高近一成，可惜魚缸腳震震，佢嘅升幅其後都縮返唔少，想高位獲利嘅缸友們，唔知頭先有無把握好機會呢？如果正話沽唔切，博客建議繼續坐貨都無妨，坐定定等收息好過，如果跌穿月內最低位（約２﹒４３銀）先走人都未遲。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》講述被情緒困擾真實個案，情緒病最終如何走出低谷？► 即睇
