健身群組牽連廣　股壇大隻佬話要fit最緊要忍口！

　　有單嘢傳遍中環，唔係某某大行又有高層人事變動，或者邊間公司賺多賺少，而係好多中環人翁‵鍾意去操肌嘅西營盤健身中心URSUS Fitness疫情大爆發呀，截至噚日，呢間健身中心已經有累計逾50人染疫，最新消息指今日（11日）香江新增約60宗確診個案，大多數都係涉及URSUS Fitness。

　　噚日（10日）已經傳出瑞士資本銀行「炒房」要拉橙白封條、炒房人去樓空嘅相。而政府已經落咗order，今個月1號至9號去過URSUS嘅240幾人要檢疫。孖屐另外流出一封疑似由URSUS send畀會員嘅通知，話牽涉嘅公司包括高偉紳律師事務所、匯豐銀行、法興、瑞信同富瑞，呢啲公司都要求員工檢疫，但唔知淨係特定群體定係全部都要做。

　　事實上，呢間fitness好多本身做健身教練嘅人都有去，呢件事已經令到另外6間健身室要暫時停業，據通知所講，因為URSUS 準備緊搞白領拳賽，所以近排係更加多人去training。都唔怪得班中環人咁驚，咁搞法分分鐘成個金融圈都出事㗎嘛！勢利啲睇，如果炒房啲人去晒隔離，邊個幫公司搵錢？更甚者，呢單嘢有可能成為「跳舞群組翻版」，造成第5波疫情爆發。今日香江魚缸尾盤急挫幾百點，都唔知關唔關事。

　　依，咁港股成交額……值得留意下。

　　同有「股壇大隻佬」之稱嘅香港股票分析師協會副主席郭思治傾開，佢話自己無去開健身室，建議大家如果停業期間又唔想前功盡廢，最緊要忍下口，唔好對住個mon啪薯片，仲有唔好食宵夜。屋企有situp板、啞鈴就要盡用。

　　希望業界所有人都冇咩事啦，如果唔係，員工唔開心、老細唔開心、缸友更唔開心，就無謂啦。

文：任盈盈

【你點睇】的士記分制將於周末生效，你認為該制度可否幫助的士提升服務質素？► 立即投票