《言歸政傳－ＪＹ》青嶼幹線雙向收費未搞掂，塞車塞到人都癲

　　今日又係Ｂｌｕｅ　Ｍｏｎｄａｙ，但係對於住喺屯門、元朗、天水圍嘅新界西朋友仔嚟講，可能話係Ｂｌａｃｋ　Ｍｏｎｄａｙ會貼切啲！事關運輸署噚日開始喺青嶼幹線實施雙向收費，今日就係改變模式之後嘅第一個工作日，結果去機場條路出現大塞車，條龍仲去到屯門公路，有成１０公里咁長添！搞到附近啲交通都大受影響，大欖隧道往九龍方要間歇性封閉，最後塞咗成三個鐘頭！Ｊｅｎｎｙ喺面書都見到有朋友因為咁而Ｍｉｓｓ咗班機，仲有小妹喺嗰邊住嘅好姊妹因為咁而遲到。面書上一片怨聲載道，個個「媽媽」聲！

＊封５條繳費通道，市民火都嚟＊

　　雖說住香港「大西北」嘅居民一向以性格堅韌見稱，屯門公路塞車嘅大場面早已見怪不怪，但係今日嘅擠塞情況之差，令佢哋都忍受唔住要爆喇！究竟點解會塞得咁誇張呢？
　　嗱！根據運輸署上個星期公布，噚日（２０號）凌晨零時起已經實施咗雙向收費安排，往機場方向嘅大嶼山收費廣場，因為要安裝收費設施同埋做相關土木工程，第１３至１７號嗰５條繳費通道，會一直封閉到１２月。結果今朝（２１日）只有２條自動繳費通道及４條人手繳費通道做嘢，比平日少咗近半，完全無法應付工作日嘅交通流量，１０里車龍就係咁育成咗喇！
　　塞到天昏地暗之時，運輸署嗰邊就話係因為啲司機未習慣個新安排，要多啲時間嚟找錢喎！聽日就會開多兩個收費亭，希望可以疏導車流。有網民聽到呢個回覆真係火都嚟，就話：「好明顯塞車嘅司機全部都一定未出過城啦！紅隧西隧都一定未行過。」、「全部都係新丁，的士佬都係第一日返工（好似係）」等等，暗串當局推卸責任、亦有人明鬧「未搞掂，就唔好實行啦！」、「衰咗仲要死撐！」、「開學日就大劑」。
　　而立法會交通事務委員會主席陳恒鑌就話現場仲有工程做緊，即使聽日加開收費亭應該都係紓緩唔到塞車問題，認為當局輕視改變模式的影響。佢都好坦白咁話，工程完成前其實唔需要急於實施雙向收費，或者考慮分階段收費，又或者當局可以考慮２４小時施工去加快進度。

＊鄺神爭啲「中招」，Ｓａｍｍｉ樂觀面對＊

　　塞車影響搵食、去旅行，唔只星斗市民嘈到拆天，連立法會議員都爭啲「中招」。好似一樣係「新界西之友」嘅鄺神鄺俊宇咁，平日搭開巴士由天水圍返金鐘立法會，好彩臨出門口睇睇交通情況，轉咗搭西鐵。如果唔係應該會都開完佢先返到立法會喇！新民黨離島區議員傅曉琳
（Ｓａｍｍｉ）大本營係東涌，都同Ｊｅｎｎｙ大嘆一聲，今日佢嗰區身受其害，希望明天會更好咁話！Ｓａｍｍｉ你真樂觀！
　　眼見塞車塞到個個市民仲㷫過今日嘅天氣，運輸及房屋局長陳帆等人咋咋臨喺傍晚收工時間之前去到現場視察下咩環境先！轉個頭就有架工程車送嚟一個新收費亭連安裝。署理運輸署署長李萃珍喺見傳媒時就「耍冧」，話今朝嘅擠塞對市民造成影響「唔好意思」，又解釋多次係由於駕駛者及收費員尚未適應新措施，但覺得係有改善嘅地方。唔知大家對呢個道歉收唔收貨呢？
　　哎呀！Ｊｅｎｎｙ一聽１２月先完成收費亭工程，就非常憂心，咁之後日子點算？其實雙向收費係為咗配合港珠澳大橋第時通車用嘅，Ｋｅｅｐ住用返單向收費，直至至少八成收費亭都投入服務，咁就可以減低擾民程度啦！反正港珠澳大橋通車年底係咪可以如期通車仍然係未知之數啊！Ａｎｙｗａｙ，各位「新界西之友」聽日祈求西鐵千萬唔好壞！如果有讀者趕飛機的話，最好搭港鐵喇！加油啊！《Ｊｅｎｎｙ　Ｙｉｎ》