今日魚缸最多跌567點，收市跌266點，科技股係隻巴巴(09988)叫做頂得住，三桶油就全軍覆沒，中石油(00857)同中海油(00883)跌超過4巴仙。成個大環境由講通脹轉到講衰退，對石油需求一定有好大打擊，三桶油短線係咁先？
講到今日有單傳聞，話中國旅遊零售運營商中國中免，計劃集資20億到30億美金(折合約156億至234億港紙)，最快計劃喺第三季度上市，中金同瑞銀為聯席保薦人。其實呢單嘢本來應該好早成事，就去到臨門一腳中免突然「拗柴」，話當時受新冠疫情等因素影響，全球經濟大受衝擊，最終無奈暫緩上市計劃。
當然，依家中免重啟上市都係傳啫，公司方面仲未證實，唔知今次又會唔會放飛機。只不過，港交所(00388)今日跌市下嘅走勢算ok，全日上落唔大，最後跌近1巴仙報367.8銀。嚟緊憧憬中概股回流，又有ETF通開通，呢排新股都開始陸續上市，如果有埋中免呢隻大嘢上市嘅消息加持，港交所呢鋪「真的很興奮」，上番500銀不是夢？請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
41,503.10
