《魚缸博客》股市又有一個棚燒到灰飛煙滅？你睇下植物肉股價就會明

　　話說幾年前，大家唔知點解好似癡晒線咁討論一個投資概念板塊-植物肉。所謂「植物肉」，就係使用使用植物蛋白質（如大豆、豌豆、小麥等）製成嘅仿肉食品，透過加熱、擠壓等方式使其具有類似動物肉嘅口感、味道和外觀。

　　當年誠哥旗下「維港投資」更有份前期投資一間叫「Impossible Foods」嘅公司；而其他外國財演又吹噓到植物肉可以解決糧食問題，又話係人類未來食品希望。

　　博客當年睇完，笑笑口無出聲，但當年博客覺得呢個投資板塊其實係極大錯誤。

　　你睇下個堆所謂「植物肉」原來，其實咪就係大家成日係去齋鋪食個堆「齋肉」咋嘛！只係換個形式，做下漢堡夾下漢堡包，就話係未來希望。如果真係做到未來食品希望，就一定唔會係你外國公司做，中國大把食品公司做左啦。

　　你幻想下，我地泱泱「科技大國」，都未做到將「齋肉」取代到傳統肉食，而且我地整齋肉歷史一定長過外國，所以鬼佬整齋會好食過我地中國人？唔信囉。事實上，外國植物肉今日徹底失敗，歸咎兩大原因：賣得貴，無肉味。

　　一份植物肉漢堡賣15.99美金，而一份「真肉」漢堡只係13.99美金，甚至9.99美金就得。你賣得比人貴，又唔見得特別好味，所以你睇下Beyond Meat Inc(US.BYND)股價，2019年歷史高位234.9美金，跌到落今日得1.34美金，市場股價已經反映一切。

　　都係個句啦，個棚已經搭完，錢就已經袋袋平安。如果班鬼佬一早知道我地「食齋文化」，呢個所謂「植物肉」行業一定唔會炒得起。

《編者按》本欄搜羅即市傳聞，惟消息未經證實，《經濟通》亦不保證內容之準確性。