《魚缸博客》加拿大大媽Ruby Liu大戰九大地產商，究竟因為咩內幕？

　　之前應該都有聽博客講過一個加拿大有錢大媽Ruby Liu劉偉宏，佢想收購加拿大老牌百貨哈德遜灣（Hudson’s Bay），不過最近有消息指，Ruby姐竟然敗北，兼且原來當中有內幕！

　　早前都有報導，擁有335年歷史嘅哈德遜灣百貨，最近宣布關閉門店，呢個消息就引來Ruby Liu嘅興趣，所以係哈德遜灣百貨門店拍賣會上，Ruby Liu就用接近7000萬加元，收購28處哈德遜灣百貨門店連租約，不過就引來呢28間門店嘅業主反對，所以就打官司啦；最後結果就係Ruby Liu敗訴。

　　法官指出，Ruby Liu嘅商業計劃缺乏可行性、管理團隊經驗不足、資金來源存疑，風險「重大且現實」。

　　不過現實係點呢？博客收到個加拿大朋友同我分享，佢話哈德遜灣百貨嘅門店，好多租約都係一口氣簽左九十年，所以「一約傳三代，人走約還在」，呢九大地產商嘅算盤係，原本打算等佢破產收返間門店，再高價出租；而家個大媽Ruby Liu竟然話想收購呢堆「原租約門店」，咪即係地產商個如意算盤打唔響？

　　另一方面，加拿大人都覺得Ruby Liu城府太深。朋友舉例話，Ruby Liu係香港持有公司A，公司A持有加拿大公司B，公司B先購入哈德遜灣百貨部分股權，另一部份係Ruby Liu個姊妹持有，其實大家都唔知Ruby Liu有無錢、錢從哪來、又會轉去邊，所以法官先話「資金來源存疑」。

　　咁係咪又代表呢單案件曲終人散呢？又未必，因為遽聞Ruby Liu而家想上訴，同班地產佬打持久戰，畢竟呢舊「90年租約」嘅肥豬肉個個都想要，遽聞個租約出租價已經比起市場租價有折讓三成，就算搶到再拎出去轉售，都係幾乎係Free Money咁際，博客都想睇係劉大媽點樣大戰加拿大地產佬，花生二兩唔該！

《編者按》本欄搜羅即市傳聞，惟消息未經證實，《經濟通》亦不保證內容之準確性。