RSS訂閱 魚缸噚日高位急回400點，升足成個月終於肯回頭，但到今朝都未算跌得好多，可能今轉調整都唔會太耐。而且呢兩日調整之中，除咗藍籌重磅回吐之外，其餘板塊回吐幅度都未至於好大，反映大市仲係炒股唔炒市。
互聯網醫療股向來都唔係炒作主力，通常都係跟隨大市或者板塊上落，係之前上面封城要依賴網上藥房配送抗疫包先炒過一次。而近呢幾日，網醫之一嘅叮噹健康(09886)走勢強勁，上星期二仲單日內急升七成。
雖然叮噹健康3月底公布上年全年業績，純利的確係大幅收窄，但都係3月公布，好難到5月先急升。但其實叮噹健康已納入恒生綜合指數，亦係港股通標的之一。被納入港股通除咗一定要係恒生綜合指數成分股，每月成交量流通比率要多於0.05%，而且12個月平均市值都要高於50億銀，但叮噹健康目前市值都唔夠23億銀，而過去近四個月時間甚至仲要低過而家，所以都好大機會唔符合到港股通條件。
如果要繼續符合條件，就一定要比起目前市值翻倍先會避免被踢出港股通，而且成交量都有必要增加，而呢一點就好大程度成為股份急升原因，唔排除係有人為咗保留港股通資格而炒高股份。以目前走勢嚟睇，上星期急升七成，仲一度升穿250天線，之後股價回落，初步先以10天線為回落目標，之後有機會再度炒上，初步先挑戰2.5銀，但記得只限小注博上！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】辭任終院法官撰文指本港法治受干預，政府反駁強調不受政治壓力，你是否支持政府回應？► 立即投票
