《古臣周記－古臣》被陷晶片羅生門中興急澄清，中美風眼股暫觀望

　　中興（００７６３）最近嘅走勢可以話係峰迴路轉，用佢官方嘅話講，因部分自媒體嘅誤讀其股價當日被炒高逾兩成，因此就急急腳發澄清話，自己係設計晶片非製造晶片。不過，阿臣覺得最醒都係主要股東，星期一就沽兩千萬股Ａ股（深：００００６３）套現離場。究竟今次中興晶片羅生門當中暗含咩？中興又在擔心咩？點解咁趕著澄清？
　
＊晶片設計ｖｓ晶片製造＊
　
　　上個星期四（１８日）就有內地媒體就轉述中興喺官方互動平台講「７ｎｍ晶片規模量產，５ｎｍ晶片開始引入」，但有部分自媒體就解讀成中興可以自己生產７ｎｍ嘅晶片，結果股價當日就被炒高超兩成。上個星期六（２０日），中興就官方澄清道，「在晶片設計領域，中興通訊專注於通信晶片嘅設計，並不只是晶片生產製造能力。在晶片的生產和製造方面，我們依托全球的合作夥伴進行分工生產。」星期一（２２日）當日開市，中興Ｈ股股價就裂口低開逾８巴仙，基本上回吐上個星期一半升幅。
　　點解設計晶片同製造晶片之間嘅差別相差咁遠？阿臣先喺到簡單咁講下晶片製造商，目前全球上可以量產晶片嘅晶片產商可以話係屈指可數，有英特爾、三星同華為旗下嘅海思。而大家聽得最多嘅高通、聯發科只有設計能力。從數量上就可以睇到點解中興一被解讀成可以自主生產晶片就突然變得咁值錢，兩日內市值激增１５０億銀，皆因物以稀為貴。加上，目前全世界都係到搶先建設嘅５Ｇ，對於晶片嘅需求好大且要求高，花旗國又打壓神州唯一可以生產高質晶片嘅華為，所以聽到中興可以自主生產高要求晶片「孖屐」就瘋狂了。
　
＊中興或怕槍打出頭鳥＊
　
　　成日都話神州同花旗國之間嘅貿易戰其實並非貿易順差咁簡單，「孖屐」都覺得花旗國係趁機打壓神州嘅技術，尤其係５Ｇ技術，爭第一個控制５Ｇ話事權。作為擁有好多５Ｇ相關技術嘅華為就成為咗花旗國第一槍要打嘅出頭鳥。對於中興上個星期瘋狂嘅漲勢，大行富瑞就喺報告話，覺得中興嘅升勢難以理解。而且，佢仲強調中興嘅晶片設計能力愈強，同華為一樣被美國限制嘅風險就愈高。
　　其實，中興同花旗國嘅糾纏可能仲早過華為。２０１６年，中興因為違反花旗國單方面對伊朗實施嘅出口禁令，而被花旗國商務部以違反美國出口管制法規為由將佢列入「實體清單」。雖然最終中興交左近９億美金罰款完事，但２０１８年又被制裁，禁止花旗國公司向中興銷售零部件、商品、軟件和技術，直到２０２５年。不過，上個星旗花旗國侵侵就話，自己主導放寬對中興嘅限制。所以，阿臣覺得中興今次動作咁快都有可能被罰怕了。

＊加大研發惟效果存疑＊

　　中興因經歷花旗國多年嘅打擊，佢開始將重心轉向研發。據中興上年全年成績單顯示，初步累計研發支出１２５億美金，佔總體營收達到１４巴仙，而今年首季佢研發佔比達到１５巴仙，已經可以同華為看齊（１５巴仙）。而近日熱炒嘅５ｎｍ晶片，原來早在上年年中，中興就已披露過５ｎｍ晶片正在進行技術導入的消息。中興通訊總裁徐子陽表示，５ｎｍ晶片商用會喺明年推出。
　　雖然中興自身喺５Ｇ行業發展得唔錯，但對比華為仍然係相差較大。目前在全球運營商市場中，華為市場份額接近一半。華為在標準的專利方面應該是提供了１６０００多個５Ｇ標準體驗，２０１９年全球５Ｇ　ＳＥＰ標準必要專利排名中，以２１６０項專利數排名第一，佔全球比達到兩成，而中興以１４２４項排第三。因此，富瑞喺報告上補充到，如果中興自己設計嘅７ｎｍ晶片進入量產，只有台積電能生產，但台積電未提及中興會是一個可部分抵銷華為業務量潛在下降嘅客戶，且對其是否真的需要７ｎｍ晶片用於５Ｇ基站表示懷疑，畢竟佢依家用跟英特爾１０ｎｍ晶片。
　
＊微盟集團若再穿９銀先止賺＊
　
　　因此，儘管中興在５Ｇ晶片技術上取得大進步，惟目前中興實力離龍頭仍有差距。對內有行業龍頭華為領佔市場；對外仍然受到花旗國的制裁，加上今年係花旗國總統大選年，神州同花旗國之間摩擦恐不斷。相信相關因素對中興走勢有所限制，阿臣對佢暫持觀望態度。
　　另外，近日熱炒嘅ＳａａＳ股有散水之勢，加上微盟（０２０１３）「刪庫事件」最近開庭，料股價會順勢有較大回調，阿臣決定先搵位吃糊先，若股價跌穿９銀就止賺離場。至於倉內其他股份就繼續按兵不動。
　
　　表列截至６月２４日阿臣投資組合表現：
　
　　股份　　　　　　股數　　　　　平均買入價（元）　　　現價（元）　　　總值（元）
　　－－－－－－－－－－－－－－－－－－－－－－－－－－－－－－－－－－－－－－－
　　港股：　
　　ＳＰＤＲ金ＥＴＦ　　１０股　１０９７﹒００　　　１２８７﹒５０　　　１２８７０
　　平安好醫生　　　　２００股　　　５２﹒９０　　　　１１６﹒３０　　　２３２６０
　　阿里巴巴　　　　　１００股　　１７６﹒００　　　　２２３﹒２０　　　２２３２０
　　微盟集團　　　　２０００股　　　　４﹒５５　　　　　　９﹒００　　　１８０００
　　三一國際　　　　２０００股　　　　４﹒１１　　　　　　３﹒５５　　　　７１００
　　港交所　　　　　　１００股　　２６４﹒５０　　　　３１９﹒８０　　　３１９８０
　　－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　：　　１１５５３０元
　　剩餘現金　　　　：　　１０１０８６元
　　組合淨值　　　　：　　２１６６１６元
　　組合本月收益表現：　　＋　６﹒８％（截至上月底止組合淨值：２０２８２０元）
　　組合累計收益表現：　＋１０６﹒３％（本金１０５０００元計）（２０１６年８月開倉）
　
　　＊數據截至今日上午１１：１５ａｍ