五月嘅時候，阿臣提過嘅界內證，終於喺上個星期四（１８日）出世，一如之之前所講，喺市況牛皮之下界內證會係一個唔錯嘅投資選擇。界內證首推有更多資料公布，等阿臣同大家ｕｐｄａｔｅ些少啦。
＊界內證成交淡靜，中移動證勝率高？＊
現時有嘅界內證所掛勾嘅標的物唔係隻隻魚毛都有，只有成交比較大嘅五隻藍戰士，分別係ＱＱ（００７００）、建行（００９３９）、中移動（００９４１）、ＡＩＡ（０１２９９）及平保（０２３１８），指數界內證暫時就只有恒指。之前阿臣都講過，界內證只要喺上下限之內就有錢收，現時每股就可以收到１銀，而如果唔好彩超出上下限範圍就只可以收到０﹒２５銀，換言之缸友喺第二市場買賣嘅時候，就唔應該沾手價值高過１銀同低過０﹒２５銀嘅界內證。
講其他衍生工具都會提到時間值嘅概念，界內證同樣有呢個概念。好似對認股證嚟講，愈近到期日就愈不利，不過對界內證嚟講時間值嘅概念就唔同，時間值高低取決於相關資產價格係咪處於界內，只要愈近到期日，時間值就會上升，反之亦然。
「孖屐」首日推出４５隻界內證畀缸友選擇，喺市況淡靜下，推出嘅第一日整個界內證嘅成交只有１１８７萬銀，其中當日一隻成交最多嘅恒指界內證（４７０４８）就錄得４２８萬銀成交，但打後幾日就無晒影，其他界內證都有呢個情況，或者要等接近到期日前嗰個月先會活躍返啲？順帶一提呢隻界內證上下限分別係２９０８０至２７６００，現時仍然喺界內，不過個ｒａｎｇｅ都幾窄，而且距離到時日即係出年嘅１月３０日仲有半年，阿臣認為現時買呢隻回報同值博率都唔大。
反而留意吓同個股掛勾嘅界內證可能勝算會大啲。既然界內證係適合牛皮市，咁五隻藍戰士入邊，自然就唔諗ＱＱ、平保同ＡＩＡ囉，皆因呢三隻波幅都幾大。淨低兩隻，阿臣就睇中神州移動掛勾嘅界內證（４７０２２），佢嘅上限價係８８銀，下限價就係６３銀，到期日同樣仲有半年。阿臣之所以睇好呢隻界內證，除咗神州移動一向以「牛皮」見稱，睇睇神州移動嘅股價表現同前景就一目了然。佢之前因為減派息同提速減費而由３月初高位開始回落，未來除非５Ｇ有咩大消息，否則爆上嘅機會唔多，而講落呢隻魚毛五年嚟最差都未穿過６４銀呢啲位，無咩消息下，往後走勢似乎都係橫行多，所以缸友現時可以考慮呢隻界外證，現時買落到到期日唔出界都有一成半賺！
＊恒指小型頭肩頂形態告終，留意儲局議息結果＊
魚缸繼續唔上唔落，之前因為紐約聯儲澄清並非大吹鴿風，「孖屐」對儲局月底減息半厘嘅憧憬即刻降溫，只係預期減息四分一厘，加上２５隻科創板星期一（２２日）首開，隻隻都有斬獲，部分資金都轉晒去嗰邊，魚缸呢邊都係唔上唔落多。上個星期四（１８日）阿臣仲睇緊魚缸會唔會築緊小型頭肩頂，頸線位置約２８０００，不過隨住恒指升破咗百天線，呢個形態好似已經告終，短期恒指都應該無大上大落嘅機會，隨咗要留意香江時間８月１日凌晨聯儲局議息會議結果，嚟緊中美貿易戰走向缸友都要留意，因為中美間好似會喺嚟緊嘅星期一（２９日）再作面對面會談。
個股方面，金界（０３９１８）噚日（２３日）派中期業績，純利升３６巴仙，博彩總收入增長２２巴仙，派中期息２６﹒２７仙，盤數細項幾乎都有雙位數增長，今日（２４日）股價都即時有反應衝上１１銀，阿臣現時諗緊收埋息之後先再作打算？定先放一手止賺先呢？都係睇埋呢個星期表現先再諗囉！
表列截至７月２４日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ４０００股 ９﹒６５元 １１﹒１０元 ４４４００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ４４４００元
剩餘現金 ：１１２５８１元
組合淨值 ：１５６９８１元
組合本月收益表現：＋ ４﹒０５％（截至上月底止組合淨值：１５０８７０元）
組合累計收益表現：＋４９﹒５１％（本金１０５０００元計）（２０１６年８月開倉）
＊數據截至今日１１：００ａｍ
etnet榮獲HKEX Awards 2023 「最佳表現證券數據供應商」大獎► 了解詳情
