學者股神分享贏家心法、理財攻守道

談樓市：炒港樓黃金期已完

　　「香港炒樓嘅黃金期已完！」除了股市，關Sir也不時為香港的樓市把脈，更預測今年樓市跌兩成至兩成半。最新公佈的中原城市領先指數（CCL）超過170點，但對早於2004年上車的他來說，當年入市的CCL只為四十幾點，所揀中的大圍曉翠山莊900多平方呎單位，只需300多萬元，並於同年再購入青衣盈翠半島單位收租。「曉翠（山莊）唔係第一城樓賺咁多，高低位比較現賺兩倍幾，曾最高賺三倍，但自住冇所謂，就算跌市都唔關我事，已供完晒！」自言最憎欠人錢的他，只承造七、八年按揭便供完樓。

　　至於出租的青衣單位，曾有一段時間「吉」出，在「寧揸股票也不揸樓」原則下，他其後索性賣出。「在香港炒樓我覺得已完咗，未來10年都完咗。2009年至2018年年中呢一浪係升到你唔信，唔係話香港樓市會好似1997年咁跌好多，但在港炒樓的黃金期真係完了，因中國經濟已冇以前增長得咁快，亦唔好相信大灣區會有好多人落嚟香港住。」

無打算投資大灣區樓

　　「海外樓也要小心，也不應該買，買也要小心揀地方，由於宏觀環境轉差，可以抖抖諗吓先。」對於坊間熱睇大灣區樓盤，關Sir則耍手兼擰頭，指自住或投資也不會。「我一定唔會去大灣區買樓，唔覺得嗰啲地方好住。我驚大灣區吹得太大，你睇香港都唔係咁醒神，大灣區屬於內地，內地經濟真係會有一段時間慢落嚟，加上內地跟好多國家關係麻麻，如只靠自己塘水滾塘魚唔會好大，好多嘢賣貴咗，升得過龍。」至於投資海外樓，他認為將來可留意越南，甚至是柬埔寨等地方。

　　講到居住問題，由加拿大回流返港，大部分親人也在當地生活，關Sir坦言，若香港現有的政治環境持續，他會喜歡返加拿大長住，起碼打開報紙不會有那麼多跟政治環境有關的新聞。

　　問及會否退休？關Sir的答案是:「永不言休」，指2009年離開中大後，也只可以說他「半退休」，做一些以前沒有做過的事情，如專注做投資和在報館寫專欄，以及做智庫研究工作。他形容：「做智庫工作做開有條癮」，自己很享受刻下的工作。「呢壇嘢係屬於社會貢獻，唔係諗住賺錢，冇錢賺㗎，最緊要做自己鍾意做嘅嘢，寫我自己鍾意寫嘅嘢，鍾意就去投資，鍾意就去講Talk。」

《說說心理話》與你分享被性騷擾解決辦法，大量真實個案，唔同場所如何提防及應對？► 即睇