美團(03690)旗下KeeTa攻港滿一年，調查機構MeasurableAI發表數據，以今年3月訂單數量計，KeeTa已經成功搶佔44%嘅訂單量，一年就成功拿下本地市佔第一，美團身為重磅藍籌都唔係浪得虛名。
記得KeeTa初嚟埗到，競委會就揭露咗foodpanda同Deliveroo要餐廳簽落嘅獨家合作條款係違反競爭條例，KeeTa上線無耐競委會就做嘢，令人難免有政府為KeeTa護航嘅感覺。而時隔一年，陸企攻港好似成為趨勢，除咗餐廳爭著落嚟香港開分店，連魚缸都成為「搶攻」目標，截至4月，15隻新股入面有13間都係神州企業。
除咗上述之外，網約車都已經悄悄落戶香港。繼月初高德打車宣布上線香港市場後，浴火重生嘅滴滴出行都已經正式進軍香港。但鑑於香港「網約車」仲未合法化，目前兩間神州網約車公司都係以「網約的士」形式嚟攻港，以免落入被指係「白牌車」嘅灰色地帶。為咗「打擊」白牌車，啱啱個周末的士業界就自發放蛇捉Uber司機，有唔好彩嘅Uber司機就被扮成乘客嘅疑似的士司機「捉拿」。
據講當時報咗警，警察到場之後最終都係無作出任何檢控。特首今日行會前見記者就回應話任何人都唔應該自行放蛇，「否則有風險誤墮法網」，同時都提到有關規管網約車方面，到7月運輸及物流局就會提交初步調研結果。
雖然暫時網約車未合法化，但政府調研得就即係唔會一刀切，的士業界自行放蛇可以話係「跟車太貼」。坊間對於的士業界嘅不滿由來已久，但偏偏的士車費一路有增無減，無論係坊間不滿同車費都係一齊與日俱增，所以唔少市民都會想喺的士以外再多一個選擇。而正好呢個時侯高德同滴滴都喺今個月正式開通香港服務，而政府亦正係研究網約車合法化可行性，時間上亦都會令人聯想到上年美團攻港嘅「護航」景象。
政府今年先宣布要引進重點企業辦公室，尤其係科技企業，網約車平台當然亦係科技企業之一，嚟香港發展業務絕對係政府樂見。高德同滴滴嚟得香港，就唔會只係想做「網約的士平台」，所以一切就要等待7月調研結果公布。如果的士業界仲只係「放蛇」之類去強調網約車嘅非法性，恐怕當網約車合法化後，的士業嘅挑戰先真正嚟到。但以KeeTa攻港一年嘅成績，神州企業來港發展業務絕對會「快狠準」，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
etnet健康網購 | 6月限定優惠【送：明目藍莓精華36:1】乙樽► 火速行動
38,589.16
17,688.88
