《古臣周記－古臣》「美貌」和「新高」，虛幻得如曇花一現

　　上年１２月上市嘅美圖（０１３５７），開發神級Ｐ圖工具，幫你美白亦得，幫你極速瘦身，亦得，簡直係令人「不誠實使用電腦」嘅神器。呢隻神器上市未夠半年，最近就連連破頂，短短幾個月就由魚毛變魚王。美圖喺星期一（２０日）時亦表演咗一場極速瘦身之旅
，喺股價見２３﹒０５銀新高之後，廿分但鐘之內就倒跌，收市仲倒插１１巴仙，相信摸咗頂嘅缸友大有人在，證明「美貌」同「新高」，都係虛幻得很嘅事情，曇花一現過後就甚麼都沒有啦
。

＊股價坐過山車，主席心情亦受牽動＊

　　古臣星期二（２１日）查閱報道，原來公司公眾持股量得５﹒７億股，佔公司已發行股本
１３﹒６巴仙，而主席蔡文勝、行政總裁吳澤源就分別持有２６﹒０２巴仙同１３﹒４巴仙，蔡文勝個仔就持有７﹒１巴仙，三者因為係主要股東嘅關係，有禁售期限制，上市後頭６個月內不得減持。至於首次公開發售前機構投資者就一共佔有３９﹒９巴仙股權，同設６個月禁售期。相信所有股份都一樣，公眾持股量一偏少，股票就更好炒，難怪證監早前就咁關注創業板圍飛啦！
　　美圖由３月３日起，到上星期五（１７日）１１個交易日內漲起八成，以月計直頭亦升近八成，而星期一就見埋歷史新高，最高峰市值去到９７４﹒３億銀。創辦人蔡文勝當日心情亦同股價一樣坐過山車，初時喺微信朋友圈度仲話帶領其他科技公司大漲，到收市時股價大插後就話心情平常，多謝大家關心。　　

＊美圖＝７００＋ＡＰＰＬＥ？＊

　　美圖聲稱自己公司坐擁１１億用戶，但其實九成收入係來自賣手機，上月發布美圖Ｔ８就炒到過萬蚊人仔一部，公司又話未來主要收入來源將在於電商及廣告，有信心今年內達到收支平衡
。
　　早喺美圖蠢蠢欲動嘅時候，古臣喺啲炒股ｗｈａｔｓａｐｐ群組當中，就經常聽到人將美圖比喻為「騰訊（００７００）＋蘋果公司（ＡＰＰＬＥ）」，然後極睇好咁話。不過依古臣睇，現時作呢種定論未免言之尚早。因為美圖係自納入南下港股通買賣名單後先爆上，北水「水喉」係一大主因，至於呢條水喉幾時關就唔知啦，一關的話股價就失去一個上升因素。
　　有玩美股嘅Ｐｈｉｌｉｐ亦都同古臣講，Ｔｗｉｔｔｅｒ都坐擁逾３億用戶，但就蝕足１１年，而騰訊２００４年上市時已經取得盈利，又錄得增長，同美圖上市時，２０１３到２０１５年三年勁蝕６２億人仔嘅情形唔同。美圖能否同騰訊相提並論，就真係要頗長時間先證明到啦！
　　魚缸勢頭仲係唔錯，不過唔少股份由於升得太多，走勢都變得波動咗，仲有６日先至期指結算，古臣只好以不變應萬變啦！

　　表列截至３月２２日止投資組合表現：

　　股份　　　　　股數　　　　　　　買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　金隅　　　１００００股　　　　３﹒０２元　　　　３﹒６１元　　　３６１００元
　　匯控　　　　　４００股　　　６３﹒００元　　　６２﹒９５元　　　２５１８０元
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　：６１２８０元
　　剩餘現金　：１０６４８元
　　組合淨值　：７１９２８元

　　組合本周收益表現：－　４﹒０％
　　組合本月收益表現：－　０﹒４％（截至上月底止組合淨值：７２１９４元）
　　組合累計收益表現：＋１０﹒７％（本金６５０００元）

　　＊數據截至今日１１：３０ａｍ