【後李嘉誠時代】拆解政經格局 商業王國新變化

 

【告別篇】扑咪直擊：我對得住股東！

　

　　李嘉誠5月10日股東會後退休，當日大批傳媒一早便到其大宅追訪，又在舉行股東會的九龍海逸君綽酒店大堂，由中午守候至下午4時，誠哥終於完成長和及長實的股東會，落樓會見傳媒。此時，酒店大堂已聚集了過百名記者，一大堆電視台的攝影機、無數的相機鏡頭對準李嘉誠，見慣大場面的李超人一直展露燦爛的笑容，笑對記者提問。

　

　

　　問︰最後一日做主席，心情點呀？

　

　　李︰多謝你們咁熱情對我，非常感激。

　

　　問︰香港社會有咁多矛盾，退休之後有咩計劃去貢獻香港？

　

　　李︰一個人能力無法子做到改變，要大家都同心合力，有一個理想的目標，希望大家可以一齊做。

　

　　問︰以後係唔係見你唔到呀？

　

　　李︰都唔係嘅，如基金會有大的公眾場合就見大家。

　

　　問︰有無感動到喊出來？

　

　　李︰咁又未至於。我都唔捨得你哋！

　

　　問︰以後會唔會來股東會？

　

　　李︰唔敢保證。

　

　　問︰會唔會返去長和望下？

　

　　李︰唔止， 我聽日一樣返寫字樓，講晒。

　

　　問︰有無覺得如釋重負？

　

　　李︰我不嬲覺得無咩感覺，無咩重負。46年前我開始長江上市，Underwriter（包銷商）第一句就話你攞走兩間公司嗰時我係Private Company，資產太多。我要3蚊上市，佢第一句話唔係3蚊，係13蚊最少。我堅持都係3蚊上市。結果第一年比我預期賺多3倍幾。我的心理係以股東利益為第一，因為當時公司係私人擁有，我想建立名譽，所以第一股票賣平，第二係46年我未攞過人工，亦無攞過花紅，只係攞5,000蚊一年，一直到今日。長實股東如果當時上市買我股票，股息一路買長江，5000倍呀。如果當佢攞咗股息鎖係夾萬，唔買嘢，好似都有1500倍，都算對股東有交代。I think I have done my best。驕傲就無，但我對股東負責，對得住股東。我都話，46年來未有股東批評我有咩唔好，我做人的理想令到股東高高興興，好似今日咁。

　

　　問︰Victor有你幾多成功力？

　

　　李︰我相信Victor做得到，跟咗30年。

　

　　問︰賣樓可唔可以賣平啲？

　

　　李︰如果我賣樓，我一家賣平，股東都唔要我啦。我希望香港個個好，有辦法解決，尤其係需要樓和公屋的人，呢個係我想的。

　

　　問︰公私營合作發展農地好嗎？

　

　　李︰好呀，我贊成，總之能夠解決到我們香港大部分的受薪的人，有得好好居住。

　

臨別送暖壺 

　

　　一如3月中宣布退休的記者會，李嘉誠在股東會完結前，走下台前與逾百小股東大合照。臨別秋波，誠哥也搞搞新意思，除了招待股東午膳，長和股東獲贈日本名牌THERMOS保溫瓶，樽身刻有「不擇細流 善匯百川 李嘉誠與您共勉」、英文「CHEUNG KONG like the great river Yangtze that aggregates countless streams and tributaries Li Ka-shing」以及誠哥退休日期「10-5-2018」，各老友記小股東也冧爆。

　

　　守候了李嘉誠差不多一整天的記者，超人也獻上了一點心意，送上香港駱駝牌保溫壺及巧克力一盒，保溫壺也刻有「不擇細流　善匯百川 李嘉誠與您共勉」等中英文字句。

　

股東有話兒

　

鄺先生：對李澤鉅有信心

　

　

　　佢退休，真係戥佢開心，可以脫離工作，做自己鍾意嘅事，希望佢享受人生，唔使做咁多，都已做咗一世。

　

　　我唔係買咗好多股票，都係十幾年前買落，so far佢啲股票都好穩陣、好穩健，年年派息。

　

　　對李澤鉅有無信心？好有信心，唔會驚，因集團是集體管理嘛。

 

李生生：羡慕超人智慧多於財富

　

　

　　今日股東會氣氛好熱烈，祝福佢健康開心。感覺李澤鉅同父親作風唔太似，無乜講野，但係一個實幹的人。

　

　　李嘉誠響香港幾十年，做得咁成功，我羨慕李嘉誠的智慧多於他的財富。

　

小股東祝福

　

李嘉誠周四（10日）股東會後退休，有忠實股東周五（11日）「大手筆」地在各大報章頭版落廣告：「衷心恭祝 李嘉誠先生榮休」，下款為「一群永遠支持您的股東 敬賀」，並印上代表李嘉誠的招牌黑框眼鏡圖案，相當有心思。

　

　　「多謝誠哥，祝你身體健康！」

　

　　「李先生，多謝你多年盡心盡力，作為股東我俾你101分！」

　

　　「好唔捨得你，多謝你，希望你身體健康，退休快樂！」

　

　　「快啲嘆世界，等啲後生上位啦！」

 

etnet健康網購 | 6月限定優惠【送：明目藍莓精華36:1】乙樽► 火速行動