魚缸業績期緊張關頭，QQ(00700)出季績，巴巴(09988)仲係出截至3月全年業績，但撞正佛誕紅日，巴巴成績點都係美股炒先，魚缸唯有睇多日。近期仲有海底撈(06862)旗下隻特海(09658)出季績，最新公布第一季轉蝕454.5萬美金，作為新年度第一份成績表都有啲唔好意頭。
但睇落盤數實質未至於太差，同店銷售額總計由上年同期1.51億美金增至1.67億美金，而同店平均翻枱率總計由上年同期每日3.3次加到去3.9次，實際上生意係多咗，但同時員工成本同原材料成本都多咗，單計百分比首季收入增加16.6%，但原材料成本增加16.5%，員工成本增加19.8%，表明特海喺降本增效方面仲要努力。而呢一個都係海底撈出海之後嘅一大挑戰，始終神州以外員工成本係會以幾何級數上升，今次員工成本增幅大過收入增幅係好應該留意嘅一點。
至於帶來今季虧損嘅最大因素就係匯率因素，特海提到其他虧損增加1120萬美金，主要係由於其他貨幣兌美元貶值導致未變現匯兌虧損，唔關生意事但都足以令特海由盈轉虧，呢個都係特海業務遍及多國而會有所出現嘅因素。
唔知係咪因為咁，特海同時宣布即將發行新ADS，喺納斯達克發行269.27萬股作港股以下雙重上市，變身成為中概股之一，發行價將會參考上市前港股收市價。如果美元強勢會令特海出現未變現匯兌虧損，當美國減息美元轉弱，特海都有可能因為匯率而賺多咗，可能就係趁呢個原因而發ADS吸引返美資。
不過270萬股唔夠真係唔算多，可能特海都仲想摸一摸美股市況先算，但港股方面好消息一出今日最高炒過上18銀以上都要倒跌，可能ADS上市前都仲有回調空間都未定，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
38,852.86
5,306.04
